பதுங்கிய குற்றவாளியை பிடிக்கச் சென்றபோது மலையில் சிக்கிய 5 போலீஸாா்! தீயணைப்புத் துறையினா் மீட்டனா்!

கடையத்தில் மலையில் மனைவியுடன் பதுங்கிய குற்றவாளியைப் பிடிக்கச் சென்றபோது மலைப் பாதையில் சிக்கி கொண்ட 5 போலீஸாரை தீயணைப்புத் துறை வீரா்கள் 8 மணி நேரம் போராடி பத்திரமாக மீட்டனா்.

தென்காசி மாவட்டம், கடையம், கல்யாணிபுரத்தைச் சோ்ந்தவா் பாலமுருகன் (30). இவா் மீது தமிழகம், கேரள மாநிலங்களில் 80-க்கும் மேற்பட்ட குற்ற வழக்குகள் உள்ளன; பல வழக்குகளுக்கு சிறைத் தண்டனை விதித்து சிறையில் அடைக்கப்பட்டவா்.

இந்த நிலையில், கேரள மாநிலம், திருச்சூா் சிறையில் அடைக்கப்பட்டிருந்த இவரை, தமிழக போலீஸாா் நவம்பா் முதல் வாரம் விருதுநகா், அருப்புக்கோட்டை நீதிமன்ற விசாரணைகளுக்காக அழைத்துவந்து நீதிமன்றங்களில் முன்னிலைப்படுத்திவிட்டு மீண்டும் திருச்சூா் சிறைக்கு அழைத்துச் சென்றனா். திருச்சூரில் சிறை நுழைவாயில் அருகே சென்றபோது பாலமுருகன், தமிழக போலீஸாரைத் தாக்கிவிட்டு தப்பிச்சென்றாா்.

தலைமறைவான இவா், தென்காசி மாவட்டம், கடையத்தில் பதுங்கியிருப்பதாக தென்காசி மாவட்ட காவல் கணிகாணிப்பாளருக்கு தகவல் கிடைத்தது. அதன்பேரில், சிறப்புப் படையினா் கடையத்தில் கண்காணிப்பை தீவிரப்படுத்தினா். தனது மனைவி ஜோஸ்வினாவைக் காணவந்த பாலமுருகன், கடையத்தில் ராமநதி அணைச் சாலையில் உள்ள மலை மீது மனைவியுடன் பதுங்கியிருப்பது உறுதி செய்யப்பட்டது.

இதையடுத்து, சிறப்புப் படையினா் 50-க்கும் மேற்பட்டோா் வியாழக்கிழமை மாலை அந்த மலையைச் சுற்றிவளைத்து தேடுதல் வேட்டையில் ஈடுபட்டனா். இரவு 8 மணியளவில் மழை பெய்ததால் 5 போலீஸாரும் வழிமாறி நடுமலையில் சிக்கிக் கொண்டனா். மலையிலிருந்து கீழே இறங்கி வர முடியாமலும், மேலே ஏறிச்செல்ல முடியாமலும் தவித்தனா்.

5 போலீஸாா் சிக்கிக் கொண்டதும் அவா்களுடன் சென்ற போலீஸாா் தீயணைப்புப் படை வீரா்களுக்கு தகவல் தெரிவித்தனா்.

தகவல் அறிந்ததும் தென்காசி, ஆலங்குளம், சுரண்டை, கடையநல்லூா் உள்ளிட்ட தீயணைப்பு நிலையங்களிலிருந்து 50 மீட்புப் படை வீரா்கள் விரைந்து சென்று போலீஸாரை மீட்கும் பணியில் ஈடுபட்டனா்.

இந்தப் பணியை தென்காசி மாவட்டக் காவல் கண்காணிபாளா் அரவிந்தன், ஆலங்குளம் காவல் துணைக் கண்காணிப்பாளா் கிளாட்சன் ஜோஸ், தென்காசி மாவட்ட தீயணைப்பு அலுவலா் மணிவண்ணன், துணை அலுவலா் பிரதீப் குமாா் ஆகியோா் பாா்வையிட்டனா்.

8 மணி நேர நீண்ட போராட்டத்துக்குப் பிறகு 5 போலீஸாரையும் வீரா்கள் பத்திரமாக மீட்டனா். அதன்பிறகு தொடா்ந்து மழை பெய்ததால் குற்றவாளியை ட்ரோன் மூலம் போலீஸாா் தேடி வருகின்றனா்.