ஆரல்வாய்மொழியில் வெள்ளிக்கிழமை விறகு பாரம் ஏற்றி வந்த டெம்போ டயர் வெடித்து கவிழ்ந்தது.
ஆரல்வாய்மொழி,தோவாளை மற்றும் பணகுடி போன்ற பகுதிகளில் அதிக அளவில் செங்கல் சூளைகள் உள்ளன. இந்த சூளைகளுக்கு விறகுகள் குலசேகரம்,கீரிப்பாறை போன்ற இடங்களில் உள்ள ரப்பர் எஸ்டேட்டுகளில் இருந்து அதிக அளவில் வருகின்றன. இந்நிலையில் வெள்ளிக்கிழமை குலசேகரத்தில் இருந்து ஒரு டெம்போவில் ரப்பர் மரங்களை ஏற்றிக் கொண்டு ஸ்டாலின் என்பவர் பணகுடிக்கு வந்து கொண்டிருந்தார்.
ஆரல்வாய்மொழி- செண்பகராமன் புதூர் சாலையில் வரும் போது டெம்போவின் பின்பக்க டயர் திடீர் என்று வெடித்தது, இதனால் ஓட்டுநரின் கட்டுப்பாட்டை இழந்த டெம்போ இடது பக்கமாகச் சென்று அருகே உள்ள பள்ளத்தில் இறங்கியதால் கவிழ்ந்தது. ஸ்டாலின் அதிர்ஷ்டவசமாக காயமின்றி உயிர் தப்பினார்.