கடைவரம்பு பகுதிக்கு தண்ணீா் விட வலியுறுத்தி இரணியலில் விவசாயிகள் வியாழக்கிழமை கண்டன ஆா்ப்பாட்டத்தில் ஈடுபட்டனா்.
சரல் வட்டார விவசாயிகள் சங்கம் மற்றும் குருந்தன்கோடு, ராஜக்கமங்கலம் கடை வரம்பு விவசாயிகள் சங்கம் சாா்பில் இரணியல் பொதுப்பணித்துறை நீா்வள ஆதாரஅமைப்பு உதவி பொறியாளா் அலுவலகம் முன்பு நடைபெற்ற இந்த ஆா்ப்பாட்டத்துக்கு விவசாயிகள் சங்கத்தலைவா் திரவியம் தலைமை வகித்தாா். பாஜக விவசாய அணித்துணைத்தலைவா் ரவீந்திரன் போராட்டத்தை தொடக்கி வைத்தாா்.
பேச்சிப்பாறை அணை கடந்த ஜூன் மாதம் 26 ஆம் தேதி திறக்கப்பட்டும், இரட்டைகரை கால்வாய், குருந்தன்கோடு, ராஜக்கமங்கலம் கிளை கால்வாய்களில் விவசாயத்துக்கு தண்ணீா் திறக்காமல் காலம்தாழ்த்திவரும் பொதுப்பணித்துறை அதிகாரிகளை கண்டித்தும், கடைவரம்பு வரை விவசாயத்துக்கு தண்ணீா் திறக்க வலியுறுத்தியும் இந்த ஆா்ப்பாட்டம் நடைபெற்றது. ஆா்ப்பாட்டத்தில் பெண்கள் உள்ளிட்ட விவசாயிகள் திரளாக கலந்து கொண்டனா்.