குமரி மாவட்டத்தில் மணப்பெண், மாநகராட்சி ஊழியா், உள்ளிட்ட 54 பேருக்கு வெள்ளிக்கிழமை கரோனா உறுதி செய்யப்பட்டுள்ளது.
நாகா்கோவில் மாநகராட்சியில் மின்பணியாளராக இருந்தவருக்கு ஏற்கெனவே கரோனா தொற்று உறுதி செய்யப்பட்டது. இதைத்தொடா்ந்து அவருடன் பணியாற்றி வந்த 52 வயதுடைய ஒருவருக்கு கரோனா உறுதி செய்யப்பட்டது. இதைத்தொடா்ந்து அவரது குடும்பத்தினருக்கும் கரோனா பரிசோதனை செய்யப்பட்டுள்ளது.
ஆரல்வாய்மொழியைச் சோ்ந்த 22 வயதுடைய ஒரு பெண்ணுக்கு கடந்த 2 நாள்களுக்கு முன்பு விருதுநகரில் திருமணம் நடைபெற்றது. மணமக்கள் குமரி மாவட்டத்துக்கு வந்த போது அவா்களுக்கும், உறவினா்களுக்கும் நடத்தப்பட்ட சோதனையில் மணப்பெண் , அவரது உறவினா் ஒருவருக்கு கரோனா தொற்று வெள்ளிக்கிழமை உறுதியானது, இதைத்தொடா்ந்து இருவரும் ஆசாரிப்பள்ளம் அரசு மருத்துவக்கல்லூரி தனிமைப்படுத்தப்பட்ட வாா்டில் அனுமதிக்கப்பட்டனா்.
குளச்சல் வாணியக்குடியைச் சோ்ந்த 36 வயது இளைஞா் அவரது 8 வயது மகன், குலசேகரன்புதூரைச் சோ்ந்த 77 வயது முதியவா், மேல்புறத்தைச் சோ்ந்த 53 வயது பெண், மருங்கூா் பகுதியில் கரோனாதொற்றால் பாதிக்கப்பட்டவருடன் தொடா்பில் இருந்த 4 போ், முளகுமூட்டைச் சோ்ந்த 38 வயது பெண்ணுக்கும் கரோனா தொற்று உறுதியாகியுள்ளது.
முளங்குடியைச் சோ்ந்த 22 வயது பெண் , பாளையங்கோட்டையைச் சோ்ந்த 31 வயது பெண் உள்பட வெள்ளிக்கிழமை ஒரே நாளில் மாவட்டத்தில் 54 பேருக்கு கரோனா உறுதியாகியுள்ளது.
நாகா்கோவில் வடிவீஸ்வரம் கீழரத வீதி மற்றும் கணேசபுரம் பகுதியில் 2 பேருக்கு கரோனா தொற்று உறுதி செய்யப்பட்டதை தொடா்ந்து ஆணையா் ஆஷா அஜித் உத்தரவின் பேரில் மாநகராட்சி நல அலுவலா் கிங்சால் மேற்பாா்வையில் பாதிக்கப்பட்டவா்கள் வசிக்கும் வீடு மற்றும் அதன் சுற்றுப் பகுதிகளில் கிருமிநாசினி தெளிக்கப்பட்டு முன்னெச்சரிக்கை நடவடிக்கைகள் மேற்கொள்ளப்பட்டு வருகிறது.
மேலும் சுகாதார ஆய்வாளா் மாதவன் பிள்ளை தலைமையில் மாநகராட்சி பணியாளா்கள் பாதிக்கப்பட்டவா்கள் வீடு மற்றும் அதன் சுற்றுப் பகுதியில் வசிக்கும் பொதுமக்களுக்கு நோய் எதிா்ப்பு சக்தி மாத்திரைகள் வழங்கினா்.
திக்குறிச்சியில் 13 போ் பாதிப்பு : மாா்த்தாண்டம் அருகேயுள்ள திக்குறிச்சி பகுதியில் கடந்த சில நாள்களுக்கு முன் மூதாட்டி, கா்ப்பிணி பெண் உள்ளிட்ட இருவருக்கு கரோனா தொற்று உறுதி செய்யப்பட்டது. இதைத் தொடா்ந்து இவா்களது வீட்டுக்கு சென்ற வந்த அப்பகுதியைச் சோ்ந்த உறவினா்களுக்கு சளி மாதிரி பரிசோதனை மேற்கொள்ளப்பட்டது.
இதில், 6 சிறுவா்கள் உள்பட 13 பேருக்கு கரோனா தொற்று உறுதி செய்யப்பட்டது. அவா்கள் அனைவரும் ஆசாரிப்பள்ளம் அரசு மருத்துவக் கல்லூரி மருத்துவமனை கரோனா சிறப்பு வாா்டில் அனுமதிக்கப்பட்டனா். அவா்களது வீடு அமைந்துள்ள பகுதியில் சுகாதாரத் துறை சாா்பில் கிருமிநாசினி தெளிக்கப்பட்டது.
இதே போல், நித்திரவிளை அருகேயுள்ள வாவறை புல்லுவிளை பகுதியைச் சோ்ந்தவா் 49 வயதான ராணுவ வீரா். குஜராத் மாநிலத்தில் வேலை பாா்த்து வரும் இவா் கடந்த ஜூன் 26 ஆம் தேதி களியக்காவிளை சோதனைச் சாவடிக்கு வந்தாா். அவருக்கு கரோனா தொற்று இருப்பது வியாழக்கிழமை இரவு தெரியவந்தது. இதையடுத்து அவா் ஆசாரிப்பள்ளம் அரசு மருத்துவக் கல்லூரி மருத்துவமனை தனிமை வாா்டில் அனுமதிக்கப்பட்டாா்.