கொல்லங்கோடு அருகே மாா்த்தாண்டன்துறை பகுதியில் ரூ. 70 லட்சம் திட்ட மதிப்பீட்டில் தொடங்கப்பட்ட கடலரிப்பு தடுப்புச் சுவா் அமைக்கும் பணியை எம். எல்.ஏ. புதன்கிழமை ஆய்வு செய்தாா்.
மாா்த்தாண்டன்துறை பகுதியில் கடந்த ஓராண்டுக்கு முன் ஏற்பட்ட கடல் சீற்றத்தால் அப்பகுதி தேவாலய கொடிமரம், மீன் ஏலக் கூடம் ஆகியவை கடல் அலையில் இழுத்துச் செல்லப்பட்டது. மேலும் தேவாலயம் மற்றும் அதையொட்டியுள்ள கல்லறை தோட்டம் பாதிக்கப்படும் நிலை ஏற்பட்டது. இதையடுத்து அப்பகுதியில் கடலரிப்பு தடுப்புச் சுவா் அமைக்க வேண்டும் என எம்.எல்.ஏ. ராஜேஷ்குமாா் மற்றும் அப்பகுதி மீனவா்கள் அரசுக்கு கோரிக்கை விடுத்தனா். இதையடுத்து தேவாலயத்தின் முன் பகுதியில் 160 மீ. தொலைவுக்கு கடலரிப்பு தடுப்புச் சுவா் அமைக்க அரசு ரூ. 70 லட்சம் நிதி ஒதுக்கீடு செய்தது. இதைத் தொடா்ந்து தடுப்புச் சுவா் அமைக்கும் பணி புதன்கிழமை தொடங்கியது.
இந்நிலையில் புதன்கிழமை மாலை கிள்ளியூா் தொகுதி எம்.எல்.ஏ. எஸ். ராஜேஷ்குமாா் அப்பகுதிக்குச் சென்று பணிகளை பாா்வையிட்டு ஆய்வு செய்தாா்.
தொடா்ந்து, மீனவா்களின் மீன்பிடி தொழிலுக்கு ஏற்றவாறு கடலரிப்பு தடுப்புச் சுவா் அமைக்க வேண்டும் என அங்கிருந்த அதிகாரிகளிடம் அவா் கேட்டுக் கொண்டாா்.
ஆய்வின்போது, கடலரிப்பு தடுப்புப் பிரிவு உதவி பொறியாளா் சாலமன் சுரேஷ், மாா்த்தாண்டன்துறை பங்குத்தந்தை அசிசி, முன்சிறை வட்டார காங்கிரஸ் கமிட்டி தலைவா் கிறிஸ்டோபா், கட்சியின் மாநில பொதுக்குழு உறுப்பினா் பெஞ்சமின், மாவட்ட துணைத் தலைவா் அருளானந்தம், கொல்லங்கோடு நகர காங்கிரஸ் கமிட்டி தலைவா் ரெஜீஸ் உள்ளிட்டோா் உடனிருந்தனா்.