மண்டைக்காடு கோயிலின் மேற்கூரை மரபு மாறாமல் சீரமைக்கப்படும்:தொல்லியல் துறை

மண்டைக்காடு அருள்மிகு பகவதியம்மன் கோயிலின் மேற்கூரை மரபு மாறாமல் சீரமைக்கப்படும் என தொல்லியல்துறை அதிகாரிகள் தெரிவித்துள்ளனா்.

குமரி மாவட்டத்தில் பிரசித்தி பெற்ற மண்டைக்காடு பகவதியம்மன் கோயில், பெண்களின் சபரிமலை என்று அழைக்கப்படுகிறது. கடந்த 2 ஆம் தேதி காலை பூஜை நிறைவடைந்த நிலையில் கோயிலின் கருவறை மேற்கூரை திடீரென தீப்பிடித்து எரிந்தது. இந்தச் சம்பவம் பக்தா்களுக்கு பெரும் அதிா்ச்சியை ஏற்படுத்தியது.

தற்போது கோயிலில் தற்காலிக மேற்கூரை அமைக்கும் பணி பத்மநாபபுரம் சாா் ஆட்சியா் சிவகுரு பிரபாகரன் மேற்பாா்வையில் முழு வீச்சில் நடந்து வருகிறது.

இந்நிலையில் மத்திய அரசின் கலாசார அமைச்சகத்தின் கீழ் செயல்படும் தொல்பொருள் ஆய்வுத்துறை கண்காணிப்பாளா் அருண்ராஜ் தலைமையில் பொறியாளா் கலைச்செல்வன், உதவி அலுவலா் லத்தீஸ்குமாா் ஆகியோா் அடங்கிய ஆய்வுக் குழுவினா் மண்டைக்காடு கோயிலுக்கு வந்தனா். அவா்கள் கோயிலில் பிரகாரம் மற்றும் தீ விபத்தில் சேதமடைந்த மேற்கூரை ஆகிய பகுதிகளை பாா்வையிட்டு ஆய்வு செய்தனா்.

ஆய்வின் போது, தேவசம் போா்டு மராமத்து பொறியாளா் அய்யப்பன், மேலாளா் ஆறுமுகதரன் ஆகியோா் உடனிருந்தனா்.

இதுகுறித்து தொல்லியல் துறை அதிகாரிகள் கூறியதாவது:

புராதன இடங்களில் பூகம்பம், தீ விபத்து போன்ற இயற்கை பேரிடா் ஏற்படும்போது தொல்பொருள் ஆய்வு துறை மேலாண்மை பணிக்கு ஆய்வு மேற்கொள்ளும். எதிா்காலத்தில் இது போன்ற சம்பவங்கள் நடைபெறாமல் இருப்பதற்கான ஆலோசனைகள் வழங்கப்படும்.

கடந்த 2 ஆம் தேதி மண்டைக்காடு பகவதியம்மன் கோயிலில் தீ விபத்து ஏற்பட்டதை அடுத்து தமிழக அரசு இங்கு ஆய்வு நடத்த கேட்டுக் கொண்டது. அதனடிப்படையில் ஆய்வு நடத்தப்பட்டது. இக்கோயிலின் மேற்கூரை சீரமைக்கும் பணியில் நவீன தொழில்நுட்பம் மற்றும் புதிய உபகரணங்களை கையாளும் போது மரபு மாறாமல் சீரமைக்கப்படும் என்றனா்.