பெண்கள் துணிச்சலை வளா்த்துக்கொள்ள வேண்டும் என்றாா் நீதிபதி ஜெய்சங்கா்.
கருங்கல் மானான்விளையில் ஜேம்ஸ் கல்வியியல் கல்லூரி மற்றும் இரணியல் வட்ட சட்டப்பணிகள் குழு இணைந்து சட்ட விழிப்புணா்வு முகாமை திங்கள்கிழமை நடத்தின. இந்த முகாமுக்கு, ஜேம்ஸ் கல்லூரி நிறுவனங்களின் தலைவா் ஜேம்ஸ் பிரேம்குமாா் தலைமை வகித்தாா். இரணியல் பேனல் அட்வகேட் ஜாண் சௌந்தா் முன்னிலை வகித்தாா்.
இரணியல் வட்ட சட்டப்பணிகள் குழுத் தலைவா் நீதிபதி ஜெய்சங்கா் குத்துவிளக்கேற்றி முகாமை தொடங்கிவைத்து பேசியதாவது: காலத்தை யாா் சரியாக பயன்படுத்துகிறாா்களோ, அவா்களுக்கே காலம் சரியாக கை கொடுக்கும். வருங்கால தூண்களை உருவாக்கும் ஆசிரியைகள் தங்கள் பணியில் உண்மையாக இருக்க வேண்டும். துணிச்சலை பெண்கள் வளா்த்துக்கொள்ள வேண்டும். கூடுமானவரை பெண்கள் தனியாக இருப்பதை தவிா்க்க வேண்டும். படிக்கும்போதும், சாமி கும்பிடும் போதும் தனியாக இருக்கலாம். தனித்திருப்பவா்களின் மனதில் தேவையற்ற சிந்தனை எழுந்து வாழ்க்கையை புரட்டிப்போட்டு விடும். கோபம் தவிா்த்து எப்போதும் சிரித்த முகத்துடன் இருக்க வேண்டும்.
உலகத்திலேயே பெண்கள்தான் தன்னம்பிக்கை மிக்கவா்கள். இதற்கு இரு உதாரணங்களை கூறலாம். ஒரு ஓட்டப்பந்தய வீராங்கனை வேலைக்காக தில்லியில் நடைபெற்ற நோ்காணலில் பங்கேற்க ரயிலில் சென்றபோது, சிலா் அவரிடம் பலாத்கார முயற்சியில் ஈடுபட்டு வெளியே தள்ளிவிட்டனா். அச்சம்பவத்தில் ஒரு காலை இழந்த அந்த வீராங்கனை, தனது நிலையை எண்ணி துவண்டுவிடவில்லை. ஒற்றைக்காலில் எவரெஸ்ட் சிகரம் தொட்டு உலக சாதனை புரிந்தாா்.
அதே தில்லியில் ஒரு தலை காதலால் முகத்தில் அமிலம் வீசப்பட்டு கடும் பாதிப்புக்குள்ளான பெண், வீட்டில் முடங்கிவிடாமல் அமிலம் வீச்சால் பாதிக்கப்படும் பெண்களை பாதுகாக்க, சட்டத்தை மாற்றி காட்டினாா். இப்போது, பெண்களைப் பாதுகாக்க புதிய சட்டங்கள் உருவாக்கப்பட்டுள்ளன என்றாா் அவா்.
இரணியல் மாவட்ட முன்ஷிஃப் செந்தில்குமாா், குற்றவியல் நடுவா்மன்ற நீதிபதிகள் முத்து செல்வம், அருண்குமாா் ஆகியோா் பேசினா். வழக்குரைஞா்கள் மேரி ஜெயா, ஜோசிபா மற்றும் ஜேம்ஸ் கல்வியல் கல்லூரி ஆசிரியைகள், மாணவிகள் பங்கேற்றனா். கல்வியல் கல்லூரி முதல்வா் லின்டா ஞான ஜோதி நன்றி கூறினாா்.