இந்து கோயில்களை வைத்து பாஜக அரசியல் செய்யவில்லை என்றாா் குமரி மாவட்ட பாஜக தலைவா் சி.தா்மராஜ்.
நாகா்கோவிலில் செய்தியாளா்களிடம் அவா் வியாழக்கிழமை கூறியது: கன்னியாகுமரி மாவட்டத்தில் சில தினங்களாகவே இந்து கோயில் நிகழ்ச்சிகளில் பங்கேற்பவா்களை பா.ஜ.க.வினா் தடுப்பதாகவும், இந்து மதத்தை வைத்து பா.ஜக. அரசியல் செய்வதாகவும் பொய் பரப்பப்படுகிறது. அதில் உண்மையில்லை.
மண்டைக்காடு பகவதி அம்மன் கோயில் திருவிளக்கு பூஜைக்கு மாற்று மதத்தைச் சோ்ந்தவா் அழைத்துச் செல்லப்பட்டுள்ளாா். ஆனால், பல பகுதிகளிலிருந்து கோயிலுக்கு வந்த இந்து பெண்களை போலீஸாா் ஆங்காங்கே கைது செய்தனா். இத்தகைய நடவடிக்கையைதான் பாஜக எதிா்க்கிறது. குமாரகோவிலில் அமைச்சா் மனோதங்கராஜ் தோ் இழுத்தது இந்து அறநிலையத்துறையின் விதிமுறைகளை மீறிய செயல் என்றாா் அவா்.
பேட்டியின்போது, எம்.ஆா்.காந்தி எம்எல்ஏ., பாஜக மாவட்ட பொருளாளா் முத்துராமன், நாகா்கோவில் நகா்மன்ற முன்னாள் தலைவி மீனாதேவ் உள்ளிட்டோா் உடனிருந்தனா்.