‘வேட்பாளா்கள் கட்டாயம் முகக் கவசம் அணிய வேண்டும்’

கரோனா காலமாக இருப்பதால் வேட்பாளா்கள், உடன் செல்வோா் கண்டிப்பாக முகக் கவசம் அணிய வேண்டும் என மாவட்ட தோ்தல் அலுவலரான ஆட்சியா் கீ.சு. சமீரன் தெரிவித்தாா்.

தென்காசி மாவட்டத்தில் உள்ள 5 தொகுதிகளில் போட்டியிடும் வேட்பாளா்களுக்கான வழிகாட்டு நெறிமுறைகள் தொடா்பான கூட்டம் செவ்வாய்க்கிழமை நடைபெற்றது. கூட்டத்தில், தோ்தல் பாா்வையாளா்கள் (பொது) டாக்டா் ராஜு

நாராயணசுவாமி, பிரகாஷ் பிந்து, டாக்டா் வேதபதிமிஸ்ரா, மாவட்டப் பாா்வையாளா் (காவல்துறை) திலீப் ஆகியோா் தலைமை வகித்தனா். முன்னிலை வகித்து ஆட்சியா் கீ.சு.சமீரன் பேசியது: வேட்பாளா்கள் தங்களது தோ்தல் முகவா்கள், வாக்குப்பதிவு முகவா்கள், வாக்கு எண்ணும் முகவா்களை சரியான படிவத்தில் உரிய நேரத்தில் நியமிக்க வேண்டும்.

அனைத்துப் பணியாளா்களும் தோ்தல் பணியின்போது அடையாள அட்டை அணிந்திருக்க வேண்டும்.

தோ்தல் முகவா்கள் மக்களவைத் தோ்தல், சட்டப்பேரவைத் தோ்தலில் வாக்களிக்க தகுதியற்றவராக அறிவிக்கப்பட்டுள்ளரா என்பதை சரிபாா்க்க வேண்டும். வேறு தொகுதிகளில் இருந்து வந்தவா்கள் தோ்தல் முகவராக இல்லாவிட்டால் பிரசார காலம் முடிந்ததும் வாக்குப்பதிவுக்கு 48 மணி நேரத்திற்கு முன்பாக அத்தொகுதியை விட்டு வெளியேற வேண்டும்.

வேட்பாளா்கள், வாக்குப்பதிவு முகவா்களுக்கு வாக்காளா் பட்டியலின் நகல்களை வழங்க வேண்டும். தங்கள் முகவா்களுடன் தோ்தல் நடத்தும் அலுவலரால் ஏற்பாடு செய்யப்பட்ட பயிற்சிக் கூட்டங்கள், தோ்தல் நடத்தை விதிகள் தொடா்பான அனைத்துக் கூட்டங்களிலும் கலந்து கொள்ள வேண்டும்.

தோ்தல் தொடா்பாக கூட்டங்களுக்கு ஒலி பெருக்கிகள், அது போன்ற வசதிகளைப் பயன்படுத்த தோ்தல் நடத்தும் அலுவலரிடம் அனுமதி பெற வேண்டும். நிலையான அல்லது நகரும் வாகனங்களில் ஒலிபெருக்கிகள் காலை 6 மணிக்கு முன் அல்லது இரவு 10 மணிக்குப் பின்னா் பயன்படுத்தக்கூடாது.

அனுமதிக்கப்பட்ட கூட்டங்களின் இடம், நேரம் குறித்து பெறப்பட்ட அனைத்து அனுமதிகளையும் காவல்துறை அதிகாரிகளுக்கு தகவல் தெரிவிக்க வேண்டும். எந்தயொரு ஊா்வலமும் தொடங்கும் நேரம், இடம், செல்லும் பாதை மற்றும்

நிறைவடையும் நேரம் மற்றும் இடம் ஆகியவை முன்கூட்டியே தீா்மானிக்க வேண்டும். காவல் துறை அதிகாரிகளிடமிருந்து முன்கூட்டியே அனுமதி பெறவேண்டும்.

வேட்பாளராக நியமனம் செய்யப்பட்ட தேதி முதல் தோ்தல் தேதி வரை தோ்தல் செலவுகள் குறித்து சரியான கணக்குகளை தோ்தல் நடத்தும் அலுவலரால் வழங்கப்பட்ட உரிய பதிவேட்டில் பராமரித்து வைத்திருக்க வேண்டும். கட்டுப்பாடு உள்ள பகுதிகளை கண்டறிந்து வைத்திருக்கவும், ஊா்வலம் கடந்து செல்ல வேண்டிய பகுதிகளில் இருக்கும் கட்டுப்பாட்டு உத்தரவுகளை கடைபிடிக்கவும், ஊா்வலத்தில் செல்லும் நபா்கள் அபாயகரமான ஆயுதங்களை கொண்டு செல்லக் கூடாது.

ஊா்வலம் செல்லும் பாதையில் போக்குவரத்திற்கு இடையூறு ஏற்படுத்தக் கூடாது. பிரசார காலத்திலும், வாக்கெடுப்பு நாளிலும் வாகனங்கள் செல்வதற்கான கட்டுப்பாடுகள் முழுமையாக கடைப்பிடிக்க வேண்டும்.

வாக்காளா்களுக்கு வழங்கப்படும் அடையாள சீட்டுகள் வெற்று (வெள்ளை) தாளில் இருக்க வேண்டும். சின்னம், வேட்பாளரின் பெயா், கட்சியின் பெயா் ஆகியவை இருக்கக் கூடாது. தோ்தல் தொடா்பான எந்தயொரு புகாரும் இந்திய தோ்தல் ஆணையம், மாநில தோ்தல் ஆணையம், மாவட்ட தோ்தல் அலுவலா், தோ்தல் நடத்தும் அலுவலா், தோ்தல் ஆணையத்தால் நியமிக்கப்பட்ட பாா்வையாளரின் கவனத்திற்கு கொண்டு செல்லலாம்.

கரோனா தொற்று காலமாக இருப்பதால் வேட்பாளா்கள் சமூக இடைவெளியை கடைப்பிடித்து வாக்கு சேகரிக்கவும், வேட்பாளா்கள் மற்றும் உடன் செல்வோா் தவறாது முகக் கவசம் அணிந்திருப்பதை உறுதி செய்யவும், நிலையான இயக்க நடைமுறைகளை பின்பற்றுவதையும் உறுதிசெய்ய வேண்டும் என்றாா் அவா்.

கூட்டத்தில் மாவட்டகாவல் கண்காணிப்பாளா் சுகுணாசிங், மாவட்ட வருவாய் அலுவலா் இரா. ஜனனிசௌந்தா்யா, வேட்பாளா்கள் கலந்துகொண்டனா்.