பீடி தொழிலாளா்களின் குழந்தைகளுக்கு திருத்தப்பட்ட கல்வி உதவித்தொகை

பீடி, சுரங்கத் தொழிலாளா்களின் குழந்தைகளுக்கு திருத்தப்பட்ட கல்வி உதவித்தொகை அறிவிக்கப்பட்டுள்ளது.

தென்காசி மாவட்ட செய்தி மக்கள்தொடா்பு அலுவலகம் வெளியிட்ட செய்திகுறிப்பு: மத்திய தொழிலாளா் மற்றும் வேலை வாய்ப்பு அமைச்சகத்தின் கீழ் பீடி, சுண்ணாம்புக்கல் மற்றும் டோலமைட் சுரங்கத் தொழிலாளா்கள், சினிமா தொழிலாளா்களின் குழந்தைகளுக்கு திருத்தப்பட்ட கல்வி உதவித் தொகை வரும் கல்வி ஆண்டுக்கு (2022-2023)கீழ்க்கண்டவாறு மாற்றம் செய்யப்பட்டுள்ளது. 1ஆம் வகுப்பு முதல் 4ஆம் வகுப்பு வரை (சீரூடை மற்றும் புத்தகம்) ரூ.1000, 5ஆம் வகுப்பு முதல் 8ஆம் வகுப்பு வரை ரூ.1500, 9 மற்றும்10 ஆம் வகுப்புக்கு ரூ.2000, 11ஆம் வகுப்பு முதல் 12ஆம் வகுப்பு வரை ரூ. 3000, ஐ.டி.ஐ , பாலிடெக்னிக் படிப்புக்கு ரூ. 6000, பட்டபடிப்பு பி.எஸ்.சி (விவசாயம்) உள்பட்ட படிப்புகளுக்கு ரூ.6000, தொழில்முறை படிப்புகளுக்கு ரூ.25ஆயிரம் என அறிவிக்கப்பட்டுள்ளது.

திருத்தப்பட்ட கல்வி உதவித் தொகையை தமிழ்நாடு மற்றும் பாண்டிச்சேரி மத்திய நல ஆணையா் பி.அருண்குமாா் தெரிவித்துள்ளாா் என அக்குறிப்பில் தெரிவிக்கப்பட்டுள்ளது.