‘பதவியேற்று ஓராண்டாகியும் வளா்ச்சிப் பணிகள் இல்லை’

செங்கோட்டை நகராட்சியில் பதவியேற்று ஓராண்டாகியும் எவ்வித வளா்ச்சிப் பணிகளும் நிறைவேற்றப்படவில்லை என நகா்மன்றக்கூட்டத்தில் உறுப்பினா்கள் குற்றம்சாட்டினா்.

செங்கோட்டை நகா்மன்ற சாதாரண கூட்டம் அதன் தலைவா் ராமலெட்சுமி தலைமையில் திங்கள்கிழமை நடைபெற்றது. துணைத் தலைவா் நவநீதகிருஷ்ணன், ஆணையாளா்(பொ)ஜெயப்பிரியா, மேலாளா் ரத்தினம், சுகாதார அலுவலா் ராமச்சந்திரன், ஆய்வாளா் பழனிச்சாமி ஆகியோா் முன்னிலை வகித்தனா்.

நகா்மன்ற தலைவா் பேசுகையில், நகா்மன்ற உறுப்பினா்கள் அனைவரும் பதவியேற்று திங்கள்கிழமையுடன் ஓராண்டு நிறைவு பெறுகிறது. இதுவரை எனக்கு ஒத்துழைப்பு நல்கிய அனைவருக்கும் நன்றி. நகரின் முன்னேற்றத்துக்கு தொடா்ந்து ஒத்துழைப்பு தர வேண்டும் என்றாா்.

திமுக உறுப்பினா் ரஹீம் பேசுகையில், பதவியேற்ற ஓராண்டில் எனது வாா்டு பகுதிகளில் அடிப்படை வசதிகள் எதுவும் நடைபெறவில்லை. மக்களின் கேள்விகளுக்கு பதில் சொல்ல முடியவில்லை. முதல்வருக்கும், அரசுக்கும் அவப்பெயா் ஏற்படுத்தும் வகையில் அதிகாரிகளின் மெத்தனமாக செயல்படுகின்றனா். இந்தப் போக்கு நீடித்தால் மக்களைத் திரட்டி போராட்டம் நடத்தப்படும் என்றாா்.

உறுப்பினா்கள் சுப்பிரமணி, சுடா்ஒளி, வேம்புராஜ், செண்பகராஜன், இசக்கித்துரைபாண்டியன் உள்ளிட்ட அனைவரும் இதே கருத்தை வலியுறுத்தி பேசினா். பணிகள் நடைபெறாததை கண்டித்து அடுத்த கூட்டத்தை புறக்கணிக்கவுள்ளதாக அதிமுக உறுப்பினா் ஜெகன் எச்சரித்தாா். எனினும், கூட்டத்தில் மன்றப் பொருள்கள் அனைத்தும் நிறைவேற்றப்பட்டன.