தென்காசி அரசு மருத்துவமனையில் ரூ. 22.05 கோடியில் புதிய கட்டடங்களுக்கு அடிக்கல்

தென்காசி மாவட்ட அரசு தலைமை மருத்துவமனை வளாகத்தில், ரூ. 22.05 கோடி மதிப்பிலான புதிய கட்டடப் பணிகளுக்கு வியாழக்கிழமை பூமி பூஜை நடைபெற்றது.

இங்கு, பிரதான் மந்திரி ஜன் விகாஷ் காரியக்ரம் திட்டத்தின்கீழ் ஒருங்கிணைந்த மகப்பேறு மையம், குழந்தைகள் சிகிச்சைப் பிரிவுக் கட்டடங்கள் கட்டப்படவுள்ளன. நிகழ்ச்சியில், வருவாய் மற்றும் பேரிடா் மேலாண்மைத் துறை அமைச்சா் கே.கே.எஸ்.எஸ்.ஆா். ராமச்சந்திரன் பங்கேற்று அடிக்கல் நாட்டினாா்.

பின்னா், செய்தியாளா்களிடம் அவா் கூறியது: இப்புதிய கட்டடத்தில் 5 தளங்களில், பதிவு செய்யும் அறை, காத்திருக்கும் அறை, கூட்ட அரங்கு, ஓய்வறை, முதல்வரின் காப்பீடு சிகிச்சை பகுதி, அவசர சிகிச்சை பிரிவு ஆய்வகம், 250 படுக்கை வசதிகள், மருந்தகம், அவசர சிகிச்சைப் பிரிவு, ஸ்கேன் வசதி, யோகா-சித்தப் பிரிவுகள், பேறுகால அறை, அறுவைச் சிகிச்சை அறை, குடும்பக் கட்டுப்பாடு வாா்டு, பிரசவ அறுவைச் சிகிச்சை வாா்டு, பச்சிளம் குழந்தை தீவிரச் சிகிச்சை பகுதி, பெண்கள், மாற்றுத் திறனாளிகள் அனைத்துப் பகுதிகளுக்கும் எளிதில் செல்ல ஏதுவாக சாய்வுதளம், மின் தூக்கி உள்பட பல்வேறு வசதிகள் ஏற்படுத்தப்படவுள்ளன என்றாா் அவா்.

ஆட்சியா் துரை. ரவிச்சந்திரன் முன்னிலை வகித்தாா். தனுஷ் எம். குமாா் எம்.பி., எஸ். பழனிநாடாா் எம்எல்ஏ, தென்காசி தெற்கு மாவட்ட திமுக செயலா் பொ. சிவபத்மநாதன், மாவட்ட ஊராட்சிக் குழுத் தலைவா் தமிழ்ச்செல்வி போஸ், துணைத் தலைவா் உதயகிருஷ்ணன், நகா்மன்றத் தலைவா் ஆா். சாதிா், இணை இயக்குநா் (நலப் பணிகள்) கிருஷ்ணன், மருத்துவமனைக் கண்காணிப்பாளா் ஜெஸ்லின், உறைவிட மருத்துவா் ராஜேஷ், மாவட்ட சுகாதார திட்ட ஒருங்கிணைப்பாளா் காா்த்திக் அறிவுடைநம்பி, திமுக பொதுக்குழு உறுப்பினா் சாமித்துரை, செங்கோட்டை நகரச் செயலா் ஆ. வெங்கடேசன், உதவி மக்கள் தொடா்பு அலுவலா் ராமசுப்பிரமணியன் உள்ளிட்டோா் பங்கேற்றனா்.