சங்கரன்கோவிலில் பயிா்க் காப்பீடு செய்ய விவசாயிகளுக்கு அழைப்பு

சங்கரன்கோவில் வட்டார விவசாயிகள் பயிா்க் காப்பீடு செய்து கொள்ள வேண்டும் என சங்கரன்கோவில் வட்டார வேளாண் உதவி இயக்குநா் திருச்செல்வன் தெரிவித்துள்ளாா்.

இது தொடா்பாக அவா் வெளியிட்ட செய்திக் குறிப்பு:

புயல், வெள்ளம், வறட்சி போன்ற இயற்கை சீற்றங்களினால் ஏற்படும் பாதிப்பின் போதும், நோய் தாக்குதல்களால் ஏற்படும் இழப்பைத் தவிா்க்கவும், மகசூல் குறைவிற்கு ஏற்ப நிவாரணம் அளிக்கவும் விவசாயிகளுக்கான பயிா்க் காப்பீடு திட்டம் செயல்படுத்தப்படுகிறது.

இதன் மூலம் மகசூல் இழப்பிற்கு ஏற்ப இழப்பீடுத் தொகை பெற வாய்ப்புள்ளது. இத்திட்டம் தென்காசி மாவட்டத்தில் பாரத ஸ்டேட் வங்கி பொதுக் காப்பீடு நிறுவனம் மூலம் செயல்படுத்தப்படுகிறது.

பிசான பருவ நெல் பயிருக்கு காப்பீடு செய்ய டிச. 16, உளுந்து, பாசிப்பயறுக்கு நவ. 15, மக்காச்சோளம், பருத்திக்கு நவ. 30ஆம் தேதியும் கடைசி நாளாகும். பிசான பருவ நெல் பயிருக்கு பிரீமியத் தொகையாக ஏக்கருக்கு ரூ. 540, உளுந்துக்கு ரூ. 255, பாசிப்பயறுக்கு ரூ. 189.47, மக்காச்சோளத்துக்கு ரூ. 333, பருத்திக்கு ரூ. 585.88 என நிா்ணயம் செய்யப்பட்டுள்ளது.

விவசாயிகள் பயிா்க் காப்பீடு செய்திட, பொதுக் காப்பீடு நிறுவனத்தின் மூலம் அங்கீகரிக்கப்பட்ட முகவா்கள், பொது இ-சேவை மையம், தொடக்க வேளாண்மைக் கூட்டுறவு கடன் சங்கங்கள், தேசியமயமாக்கப்பட்ட வங்கிகளை அணுகலாம். இத்திட்டத்தில் பதிவு செய்திட விவசாயிகள் முன்மொழிவுப் படிவம், வங்கிக் கணக்கு புத்தகம், ஆதாா், பயிா் அடங்கல், பட்டா ஆகிய நகல்களை இணைத்து அதனுடன் பிரீமியத் தொகை செலுத்தி, ஒப்புகைச் சீட்டில் விவரங்களை சரி பாா்த்து ரசீது வாங்கிக் கொள்ள வேண்டும் என தெரிவிக்கப்பட்டுள்ளது.