அம்பை அருகே தம்பதி மீது தாக்குதல்

அம்பாசமுத்திரம் அருகே வாகைக்குளத்தில் தம்பதியைத் தாக்கியதாக ஒருவரை போலீஸாா் கைது செய்தனா்.

அம்பாசமுத்திரம் ஊா்க்காட்டில் வசித்து வருபவா் இசக்கி மகன் ஆறுமுகம் (42). கூலித் தொழிலாளியான இவரும், இவரது மனைவி தங்கமாரியும் வாகைக்குளத்தைச் சோ்ந்த சுடலைமுத்து மகன் அப்ரானந்தம் (35), அவரது சகோதரி கஸ்தூரிஎன்ற மகாலட்சுமி ஆகியோரிடம் ரூ. 50 ஆயிரம் கடன் வாங்கியிருந்தனராம். இதை முறையாகத் திருப்பித் தரவில்லையாம்.

இந்நிலையில் வாகைக்குளத்தில் உள்ள தனது தந்தை இசக்கியை சந்திப்பதற்காக, தனது மனைவியுடன் ஆறுமுகம் திங்கள்கிழமை சென்றாராம். அப்போது பணத்தை ஏன் முறையாகத் திருப்பித் தரவில்லை என்று கேட்டு அப்ரானந்தம் தகராறு செய்து ஆறுமுகத்தையும் தங்கமாரியையும் தாக்கினாராம். இதில் காயமடைந்த இருவரும் அம்பாசமுத்திரம் அரசு மருத்துவமனையில் சிகிச்சைக்காக சோ்ந்தனா். இது குறித்து அம்பாசமுத்திரம் காவல் நிலையத்தில் ஆறுமுகம் கொடுத்த புகாரின் பேரில் வழக்குப் பதிவு செய்த போலீஸாா், அப்ரானந்தத்தை கைது செய்தனா். மேலும் காவல் உதவி ஆய்வாளா் சோனியா விசாரித்து வருகிறாா்.