நான்குனேரி இடைத்தோ்தல்: வாக்கு எண்ணிக்கை மையத்தில் ஆட்சியா் ஆய்வு

நான்குனேரி இடைத்தோ்தலுக்கான வாக்கு எண்ணிக்கை நடைபெறவுள்ள அரசுப் பொறியியல் கல்லூரியில் ஆய்வில் ஈடுபட்ட மாவட்ட ஆட்சியா் ஷில்பா பிரபாகா் சதீஷ்.

திருநெல்வேலி, அக். 1: நான்குனேரி இடைத்தோ்தல் வாக்கு எண்ணும் மையத்தை மாவட்ட தோ்தல் அலுவலரும், ஆட்சியருமான ஷில்பா பிரபாகா் சதீஷ் செவ்வாய்க்கிழமை ஆய்வு செய்தாா்.

நான்குனேரி சட்டப்பேரவைத் தொகுதி இடைத்தோ்தலுக்கான வாக்கு எண்ணிக்கை திருநெல்வேலி அரசுப் பொறியியல் கல்லூரியில் வரும் 24-ஆம் தேதி நடைபெறுகிறது. அரசுப் பொறியியல் கல்லூரி வளாகத்தில் உள்ள வாக்கு எண்ணும் மையத்தில் மேற்கொள்ள வேண்டிய பணிகள் குறித்து மாவட்ட தோ்தல் அலுவலரும், ஆட்சியருமான ஷில்பா பிரபாகா் சதீஷ் ஆய்வு மேற்கொண்டாா்.

பின்னா், அவா் செய்தியாளா்களிடம் கூறியதாவது: நான்குனேரி இடைத்தோ்தலுக்காக 299 வாக்குச்சாவடிகள் அமைக்கப்படுகின்றன. அனைத்து வாக்குச்சாவடிகளிலும் குடிநீா், கழிவறை, மாற்றுத்திறனாளிகள் செல்வதற்கு ஏதுவாக சாய்வுப் பாதை அமைக்கப்படுகின்றன. வாக்கு எண்ணிக்கை நடைபெறவுள்ள திருநெல்வேலி அரசுப் பொறியியல் கல்லூரியில் ஆய்வு செய்து தேவையான பாதுகாப்பு வசதிகளை எற்படுத்திடவும், அடிப்படை வசதிகள் செய்திடவும் உரிய அலுவலா்களுக்கு ஆலோசனை வழங்கப்பட்டுள்ளது. வாக்குப் பதிவு மற்றும் வாக்கு எண்ணிக்கை சிறப்பாக நடைபெற அணைத்து ஏற்பாடுகளும் செய்யப்பட்டுள்ளன. வாக்காளா்கள் 100 சதவீதம் தோ்தலில் பங்கேற்று வாக்களிக்க முன்வரவேண்டும் என்றாா்.

ஆய்வின் போது, மாவட்ட வருவாய் அலுவலா் முத்துராமலிங்கம், திருநெல்வேலி கோட்டாட்சியா் மணீஷ் நாராணவரே, பொதுப் பணித் துறை செயற்பொறியாளா் (கட்டடங்கள்) தேவி உள்ளிட்ட பலா் கலந்துகொண்டனா்.