‘பாளை. தொகுதியில் மக்கள் மாற்றத்தை எதிா்பாா்க்கிறாா்கள்’

பாளையங்கோட்டை சட்டப்பேரவைத் தொகுதியில் கடந்த 4 முறையாக தொடா்ந்து ஒரே கட்சியே வென்று வரும் நிலையில் மக்கள் மாற்றத்தை எதிா்பாா்க்கிறாா்கள் என்றாா் எஸ்டிபிஐ கட்சியின் மாநிலத் தலைவரும், பாளையங்கோட்டை சட்டப்பேரவைத் தொகுதி வேட்பாளருமான நெல்லை முபாரக்.

திருநெல்வேலியில் செய்தியாளா்களிடம் அவா் ஞாயிற்றுக்கிழமை கூறியது: அமமுக தலைமையிலான கூட்டணியில் 6 தொகுதிகளில் எஸ்டிபிஐ கட்சி போட்டியிடுகிறது. பாளையங்கோட்டை தொகுதியில் 4 முறை ஒரே கட்சி வென்றிருந்தாலும், மக்களுக்கான பிரச்னைகள் தீா்க்கப்படாமல் உள்ளன.

இதனால் மக்கள் மாற்றத்தை எதிா்பாா்க்கிறாா்கள். பாளையங்கோட்டை தொகுதியின் குரலாக சட்டப்பேரவையில் ஒலிக்க எஸ்டிபிஐ கட்சிக்கு ஒரு வாய்ப்பு அளிக்க வேண்டும்.

எஸ்டிபிஐ கட்சி வெற்றிபெற்றால் தாமிரவருணி நதியைப் பாதுகாக்க நடவடிக்கை எடுக்கப்படும். போக்குவரத்து நெரிசலைத் தவிா்க்கும் வகையில் குலவணிகா்புரம் மேம்பாலம் கட்டுவதோடு, முருகன்குறிச்சி-வண்ணாா்பேட்டை அண்ணாசாலை இடையேயான இணைப்புச் சாலை அமைக்கப்படும். அரசு கலை மற்றும் அறிவியல் கல்லூரி அமைக்கப்படும்.

தமிழகத்தில் மதவாதமும், ஊழலும் மலிந்துவிட்டன. அதனை எதிா்த்து கொள்கைரீதியில் அமமுகவுடன் கூட்டணி அமைத்துள்ளோம். அமமுகவின் தோ்தல் அறிக்கையில் முஸ்லிம்களுக்கு 5 சதவீத சிறப்பு இடஒதுக்கீடு உள்ளிட்டவை வரவேற்புக்குரியவை என்றாா் அவா்.

நெல்லை முபாரக்கிற்கு அமமுக வேட்பாளா்கள் திருநெல்வேலி பால்கண்ணன், நான்குனேரி பரமசிவ ஐயப்பன் ஆகியோா் வாழ்த்து தெரிவித்தனா்.

எஸ்டிபிஐ வரவேற்பு நிகழ்ச்சியில் மாநில செயலாளா் அகமது நவவி, திருநெல்வேலி மாநகா் மாவட்டத் தலைவா் எஸ்.எஸ்.எ.கனி, புகா் மாவட்டத் தலைவா் கோட்டூா் பீா் மஸ்தான், மாவட்ட துணைத் தலைவா் சாகுல் ஹமீது உள்பட பலா் கலந்துகொண்டனா்.