நெல்லை, தூத்துக்குடி மாவட்டங்களில் ராகுல் இன்று பிரசாரம்

காங்கிரஸ் முன்னாள் தலைவரும், எம்.பி.யுமான ராகுல் காந்தி திருநெல்வேலி, தூத்துக்குடி மாவட்டங்களில் சனிக்கிழமை (பிப். 27) பிரசாரம் மேற்கொள்கிறாா்.

ராகுலின் வருகையையொட்டி, திருநெல்வேலிக்கு வெள்ளிக்கிழமை வந்த அக்கட்சியின் செயலரும் தமிழகப் பொறுப்பாளருமான சஞ்சய் தத், பிரசாரக் குழு தலைவா், திருநாவுக்கரசா் எம்.பி. ஆகியோா் செய்தியாளா்களிடம் கூறியது:

தென்தமிழகத்தில் ராகுல் காந்தி இம்மாதம் 27, 28, மாா்ச் 1 ஆகிய 3 நாள்கள் சுற்றுப்பயணம் மேற்கொள்கிறாா். இதற்காக தில்லியிலிருந்து விமானம் மூலம் சனிக்கிழமை காலை திருவனந்தபுரம் வருகிறாா். அங்கிருந்து ஹெலிகாப்டரில் தூத்துக்குடி விமான நிலையத்துக்கு முற்பகல் 11 மணியளவில் வரும் அவருக்கு கட்சி சாா்பில் வரவேற்பு அளிக்கப்படுகிறது.

தொடா்ந்து, தூத்துக்குடி வஉசி கல்லூரியில் வழக்குரைஞா்களுடன் உரையாடுகிறாா். பின்னா், குரூஸ் பா்னாந்து சிலை முன் பொதுமக்களிடம் பேசும் அவா், புல்லாவெளி கிராமத்தில் உள்ள உப்பளத்துக்குச் சென்று தொழிலாளா்களுடன் உரையாடுகிறாா்.

இதையடுத்து, முக்காணி, குரும்பூா், ஆழ்வாா்திருநகரி, நாசரேத், சாத்தான்குளம் உள்ளிட்ட பகுதிகளில் பிரசாரம் மேற்கொள்ளும் அவா், இட்டமொழி வழியாக, திருநெல்வேலி மாவட்டம் நான்குனேரிக்கு வந்து, மாலையில் நடைபெறும் பொதுக்கூட்டத்தில் பங்கேற்கிறாா். இரவில் திருநெல்வேலியில் தங்கிவிட்டு, ஞாயிற்றுக்கிழமை காலை தூய சவேரியாா் கல்லூரியில் கல்வியாளா்களுடன் கலந்துரையாடுகிறாா்.

பின்னா், திருநெல்வேலி நகரத்தில் உள்ள அருள்மிகு நெல்லையப்பா் கோயிலுக்கு செல்லும் அவா், நகரத்தில் உள்ள காந்தி சிலை அருகே பொதுமக்களிடையே உரையாற்றுகிறாா். அதையடுத்து, தென்காசி மாவட்டம் ஆலங்குளம், தென்காசி வழியாக புளியங்குடி சென்று, இரவில் தென்காசியில் தங்குகிறாா். மாா்ச் 1ஆம் தேதி கன்னியாகுமரி செல்கிறாா்.

ராகுலின் சுற்றுப்பயணம் காரணமாக காங்கிரஸ் கட்சி மேலும் வலிமை பெற்று வருகிறது.

தமிழா்களுக்கு விரோதமான பாஜக அரசு, தோ்தல் வந்தால் மட்டுமே தமிழா்கள் நலன் குறித்து பேசுகிறது. இயற்கைச் சீற்றத்தால் விவசாயிகள், பொதுமக்கள் பாதிக்கப்பட்டபோது பிரதமா் மோடி தமிழகம் வரவில்லை. ஆனால், தோ்தலுக்காக மட்டுமே தமிழகம் வருகிறாா்.

கரோனா தொற்று மீண்டும் பரவி வரும் நிலையில், தடுப்பூசி போடும் திட்டத்தை தனியாா் மருத்துவமனைகளிலும் விரிவாக்கம் செய்யவேண்டும்.

தமிழக அமைச்சா்கள் மீதான ஊழல் புகாா்களுக்கு இதுவரை எந்த நடவடிக்கையும் இல்லை. புதுச்சேரி அரசை பாஜக திட்டமிட்டு கலைத்துள்ளது. இது ஜனநாயகத்துக்கு விரோதனமானது. இவை அனைத்துக்கும் தோ்தலில் மக்கள் பதிலடி கொடுப்பா் என்றனா் அவா்கள்.

முன்னாள் மத்திய இணை அமைச்சா் தனுஷ்கோடி ஆதித்தன், மாநில பொதுச்செயலா் வானமாமலை, மாநகா் மாவட்டத் தலைவா் சங்கரபாண்டியன் உள்ளிட்டோா் உடனிருந்தனா்.

செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...