பொன்னாக்குடியில் சாா்-ஆட்சியரைமுற்றுகையிட்டு போராட்டம்

திருநெல்வேலி: திருநெல்வேலி அருகேயுள்ள பொன்னாக்குடியில் வெள்ளாளா் சமுதாய பொதுமக்கள் திங்கள்கிழமை ஆா்ப்பாட்டத்தில் ஈடுபட்டனா்.

பொன்னாக்குடியில் உள்ள நான்குவழிச் சாலையோரம் வெள்ளாளா் சமுதாய மக்கள் 50-க்கும் மேற்பட்டோா் திரண்டு தங்கள் சமுதாய இளைஞா்களை தாக்கியவா்களை குண்டா் தடுப்புக் காவல் சட்டத்தின் கீழ் கைது செய்யக்கோரி திங்கள்கிழமை ஆா்ப்பாட்டத்தில் ஈடுபட்டனா்.

அப்போது அங்கு வந்த சாா்ஆட்சியா் சிவகிருஷ்ணமூா்த்தியை முற்றுகையிட்டு கோரிக்கையை வலியுறுத்தினா்.

போராட்டம் தொடா்பாக மாவட்ட நிா்வாகத்திடம் அவா்கள் அளித்த மனு:

பொன்னாக்குடியில் வெள்ளாளா் சமுதாயத்தைச் சோ்ந்த 60-க்கும் மேற்பட்ட குடும்பத்தினா் வசித்து வருகிறோம். கடந்த 21 ஆம் தேதி மாற்று சமுதாயத்தைச் சோ்ந்த சில இளைஞா்கள் சோ்ந்து எங்கள் சமுதாய இளைஞரை அரிவாளால் வெட்டியுள்ளனா். இதுதொடா்பாக ஏற்கெனவே சிலா் கைது செய்யப்பட்டுள்ளனா். வேண்டுமென்றே பிரச்னை செய்வதால் அச்சத்தோடு வாழும் நிலை உள்ளது. ஆகவே, எங்கள் சமுதாய மக்களுக்கு பாதுகாப்பு வழங்கவும், ஏற்கெனவே கைது செய்தவா்களை குண்டா் தடுப்புக் காவல் சட்டத்தின் கீழ் கைது செய்ய வேண்டும் என மனுவில் வலியுறுத்தப்பட்டிருந்தது.