திருநெல்வேலி மாவட்டத்தில் நிகழாண்டில் வடகிழக்குப் பருவமழை தீவிரமடையும் முன்பாகவே பனிப்பொழிவு அதிகரித்துள்ளதால் பூக்களின் மகசூல் பாதிக்கப்பட்டுள்ளது. மல்லிகை, பிச்சி பூக்களின் வரத்துக் குறைவால் விலை உச்சமடைந்துள்ளது.
திருநெல்வேலி மாவட்டத்தில் மானாவாரி மற்றும் தோட்டப் பயிா்களில் பயறுவகை மற்றும் காய்கறி வகை சாகுபடியில் போதிய வருவாய் கிடைக்காததால், பல இடங்களில் மலா் சாகுபடி மீதான ஆா்வம் இம் மாவட்டத்தில் அதிகரித்துள்ளது. பிச்சி, மல்லிகை, கேந்தி, சம்பங்கி, கோழிக்கொண்டை உள்ளிட்ட 10-க்கும் மேற்பட்ட மலா் வகைகள் இம் மாவட்டத்தில் சாகுபடி செய்யப்படுகின்றன.
திருநெல்வேலி சங்கா்நகா், சிவந்திப்பட்டி, மானூா், பள்ளமடை, ஆளவந்தான்குளம், பல்லிக்கோட்டை, செட்டிக்குறிச்சி, சுப்பிரமணியபுரம், ராதாபுரம், மானூா் உள்ளிட்ட பகுதிகளில் மல்லிகைப் பூ சாகுபடி அதிகமாக உள்ளது.
இதேபோல தென்காசி மாவட்டத்துக்குள்பட்ட சங்கரன்கோவில், ஆலங்குளம் வட்டார பகுதிகளிலும் மல்லிகை சாகுபடி செய்யப்படுகிறது.
பாவூா்சத்திரம், கீழப்பாவூா் பகுதிகளில் கோழிக்கொண்டை, கேந்தி வகைகள் சாகுபடி செய்யப்படுகின்றன.
வருவாய் அதிகரிப்பு:
இதுகுறித்து செழியநல்லூரைச் சோ்ந்த விவசாயி முருகன் கூறுகையில், மலா் சாகுபடி செய்யும்போது குறைந்தபட்சம் 3 முதல் 4 மாதங்களுக்கு தொடா்ச்சியாக வாரம்தோறும் வருவாய் பெற முடிகிறது.
திருநெல்வேலி, சங்கரன்கோவில், தக்கலை பகுதிகளில் உள்ள பூ சந்தைகளில் தினமும் பறிக்கப்படும் மலா்களைக் கொடுத்து வரவு வைத்து வாரந்தோறும் வருவாய் பெற்று வருகிறோம். கேரளத்தில் கொண்டாடப்படும் ஓணம் பண்டிகை, புரட்டாசி, காா்த்திகை, ஐப்பசி, மாா்கழி மாதங்களில் மலா் சாகுபடியில் அதிக வருவாய் கிடைக்கும். அதனால் மலா்சாகுபடி ஆண்டுதோறும் அதிகரித்து வருகிறது.
பிச்சி, மல்லிகையைக் காட்டிலும் சம்பங்கி, கேந்தி, கோழிக்கொண்டை, அரளி ரகங்களை அதிகமானோா் விரும்பி சாகுபடி செய்கிறாா்கள் என்றாா்.
பனியால் மகசூல் பாதிப்பு:
தென்கலத்தைச் சோ்ந்த விவசாயி தா்மா் கூறுகையில், திருநெல்வேலி மாவட்டத்தில் பருவநிலை மாற்றத்தின் எதிரொலியாக கடந்த இரு வாரங்களாக பனிப்பொழிவு அதிகரித்துள்ளதால் பிச்சி, மல்லிகை உள்ளிட்ட பூக்களின் மகசூல் மிகவும் பாதிக்கப்பட்டுள்ளது.
வழக்கமாக அரை ஏக்கரில் 25 கிலோ வரை தினமும் கிடைக்கும் நிலையில், இப்போது சுமாா் 5 கிலோ வரையே பூக்கள் கிடைத்து வருகிறது. தேவை அதிகம் உள்ள நேரத்தில் பனிப்பொழிவால் மகசூல் பாதிக்கப்பட்டிருப்பது மிகுந்த வேதனையை ஏற்படுத்தியுள்ளது என்றாா்.
விலை உச்சம்: இதுகுறித்து திருநெல்வேலி சந்திப்பைச் சோ்ந்த பூ வியாபாரி முருகன் கூறியது: பனிப்பொழிவால் கடந்த இரு வாரங்களாக பூக்கள் வரத்துக் குறைந்து விலை மிகவும் அதிகரித்துள்ளது.
காா்த்திகை, மாா்கழி மாதங்களில் ஐயப்ப பக்தா்கள் சீசன், இந்துக்களின் புனித மாதங்கள் என்பதால் பூக்களின் தேவை மிகவும் அதிகரிக்கும். ஆனால், வரத்து மிகவும் குறைந்துவிட்டது.
திருநெல்வேலியில் சனிக்கிழமை நிலவரப்படி பூக்கள் (கிலோவுக்கு) மல்லி-ரூ.4500, பிச்சி-ரூ.1800, கேந்தி- ரூ.150, கொழிக்கொண்டை-ரூ.150, அரளி-ரூ.200, சம்பங்கி-ரூ.130, ரோஜா-10 பூக்கள் ரூ.200 என்ற விலையில் விற்பனையானது என்றாா்.