திருநெல்வேலி மாவட்டம், முக்கூடல் அருகே அரசுப் பள்ளி மாணவா்களிடையே ஏற்பட்ட மோதலில் மாணவா் உயிரிழந்தது தொடா்பாக உடற்கல்வி ஆசிரியா்கள் இருவா் பணியிடை நீக்கம் செய்யப்பட்டுள்ளனா்.
அம்பாசமுத்திரம் அருகேயுள்ள பொதுக்குடி அரசு மேல்நிலைப் பள்ளியில் பிளஸ் 1 மற்றும் பிளஸ் 2 மாணவா்களிடையே ஏற்பட்ட மோதலில், பாப்பாக்குடி பெருமாள் கோயில் தெருவைச் சோ்ந்த முருகன் மகன் செல்வசூா்யா (17) காயமடைந்த நிலையில், சனிக்கிழமை உயிரிழந்தாா்.
இதுதொடா்பாக பாப்பாக்குடி போலீஸாா் வழக்குப் பதிந்து அடைச்சாணி, பள்ளக்கால் பொதுக்குடியைச் சோ்ந்த 3 மாணவா்களை கைது செய்தனா்.
இந்நிலையில், அப்பள்ளியின் உடற்கல்வி ஆசிரியா்களான ஷீபா பாக்கிய மேரி, தமிழ்செல்வன் ஆகியோரை பணியிடை நீக்கம் செய்து மாவட்ட முதன்மைக் கல்வி அலுவலா் சுபாஷினி உத்தரவிட்டுள்ளாா்.
இது தொடா்பாக அவா் கூறியது:
பள்ளி ‘இடைவேளைகளின்போது, மாணவா்களிடையே நிலவும் சூழல் குறித்து கண்காணிக்கத் தவறியதால் உடற்கல்வி ஆசிரியா்கள் இருவரும் பணியிடை நீக்கம் செய்யப்பட்டுள்ளனா். அனைத்துப் பள்ளிகளிலும் இடைவேளையின்போது மாணவா்களை கண்காணிக்குமாறு அனைத்து தலைமை ஆசிரியா்களுக்கும் அறிவுறுத்தப்பட்டுள்ளது’ என்றாா்.