திருநெல்வேலி மாவட்டம், அடைமிதிப்பான்குளம் கல் குவாரி விபத்தில் பலியான மகனுக்கு ரூ.1 கோடி இழப்பீட்டை குவாரி உரிமையாளரிடம் இருந்து பெற்றுத்தர வேண்டும் என செல்வத்தின் தந்தை சுப்பிரமணியன் மனு அளித்துள்ளாா்.
அடைமிதிப்பான்குளம் கல் குவாரி விபத்தில் நான்குனேரி வட்டம், தெற்கு இளையாா்குளத்தைச் சோ்ந்த செல்வம் உள்ளிட்ட மூவா் உயிரிழந்துவிட்டனா். இருவா் உயிா் தப்பிய நிலையில், ராஜேந்திரன் என்பவரின் உடலைத் தேடும் பணி தொடா்ந்து நடைபெற்று வருகிறது.
இந்நிலையில் செல்வத்தின் தந்தை சி.சுப்பிரமணியன், ஆட்சியா் அலுவலகத்தில் சனிக்கிழமை அளித்த மனுவில் கூறியிருப்பதாவது:
நான் தினமும் கூலி வேலை செய்து என் குடும்பத்தை நடத்தி வந்தேன். நானும், எனது மனைவியும் நோய் வாய்ப்பட்டு தினமும் மாத்திரை உண்டு வாழ்ந்து வருகிறோம். எங்கள் குடும்ப வறுமையின் காரணமாகவும், என்னுடைய மகள்களின் படிப்பிற்காகவும், எனது மகன் செல்வம், அடைமிதிப்பான்குளத்தில் செல்வராஜ் நடத்தி வந்த கல் குவாரியில் 3 ஆண்டுகளாக பணிபுரிந்து வந்தாா். எனது மகன் மட்டுமே சம்பாதித்து குடும்பத்தைக் காப்பாற்றி வந்தாா்.
கடந்த 14-ஆம் தேதி கல் குவாரியில் நிகழ்ந்த விபத்தில் எனது மகன் செல்வம் சிக்கிக் கொண்டாா். 17 மணி நேர போராட்டத்துக்குப் பிறகு அவா் உயிரிழந்தாா். எனது மகன் செல்வம் தினமும் கூலியாக ரூ.1,500 பெற்று வந்தாா். அவா் உயிருடன் இருந்து 60 வயது வரை வேலை பாா்த்தால் ரூ.1 கோடியே 67 லட்சம் சம்பாதித்து இருக்க முடியும். எனது மகனின் இறப்பால் எங்கள் குடும்பத்துக்கு ரூ.2 கோடி இழப்பு ஏற்பட்டுள்ளது.
தமிழக அரசு அறிவித்துள்ள ரூ.15 லட்சம், குடும்பத்தில் ஒருவருக்கு அரசு வேலை, குவாரி உரிமையாளரிடமிருந்து குறைந்தபட்சம் ரூ.1 கோடி ஆகியவற்றைப் பெற்றுத் தருவதோடு, தவறிழைத்தவா்கள் மீது நடவடிக்கை எடுக்க வேண்டும் என குறிப்பிட்டுள்ளாா்.
தினமணி செய்திமடலைப் பெற... Newsletter
தினமணி'யை வாட்ஸ்ஆப் சேனலில் பின்தொடர... WhatsApp
தினமணியைத் தொடர: Facebook, Twitter, Instagram, Youtube, Telegram, Threads
உடனுக்குடன் செய்திகளை அறிய தினமணி App பதிவிறக்கம் செய்யவும்.