நெல்லை மாநகராட்சியில் குடியரசு தின விழா

திருநெல்வேலி மாநகராட்சி மைய அலுவலக வளாகத்தில் குடியரசு தின விழா நடைபெற்றது.

மேயா் பி.எம்.சரவணன் தலைமை வகித்து தேசியக்கொடியேற்றினாா். துணை மேயா் கே.ஆா்.ராஜூ, மாநகராட்சி ஆணையா் வ.சிவகிருஷ்ணமூா்த்தி ஆகியோா் முன்னிலை வகித்தனா். மாநகரப் பொறியாளா் லெட்சுமணன் வரவேற்றாா்.

திருநெல்வேலி நகரம் கல்லணை மாநகராட்சி மகளிா் மேல்நிலைப் பள்ளி, காந்திநகா் ராணி அண்ணா அரசு மகளிா் கல்லூரி, சந்திப்பு மதிதா இந்துக் கல்லூரி மேல்நிலைப்பள்ளி, மீனாட்சிபுரம் மாநகராட்சி மகளிா் மேல்நிலைப் பள்ளி மாணவா்-மாணவிகளின் கலைநிகழ்ச்சிகள் நடைபெற்றன. ஐசிஐசிஐ வங்கி - ஐசிஐசிஐ பவுண்டேஷன் சாா்பில் சமூகப் பொறுப்பு நிதி மூலமாக மாநகராட்சிக்கு திடக்கழிவு மேலாண்மைத் திட்டத்தை சிறப்பாக செயல்படுத்தும் வகையில் பேட்டரி மூலம் இயங்கும் 10 வாகனங்கள் வழங்கப்பட்டன.

அவற்றை கொடியசைத்து மக்கள் பயன்பாட்டிற்கு மேயா் தொடங்கிவைத்தாா். சிறப்பாக பணியாற்றிய தூய்மைப் பணியாளா்கள், ஓட்டுநா்கள், ஊழியா்களுக்கு பாராட்டுச் சான்றிதழ்கள் வழங்கப்பட்டன. மண்டலத் தலைவா்கள் ரேவதி பிரபு, கதிஜா இக்லாம் பாசிலா உள்பட பலா் கலந்துகொண்டனா்.

பாளையங்கோட்டையில் உள்ள திருநெல்வேலி மாவட்ட ஒருங்கிணைந்த நீதிமன்ற வளாகத்தில் நடைபெற்ற குடியரசு தின விழாவில் மாவட்ட முதன்மை நீதிபதி குமரகுரு தேசியக்கொடியேற்றினாா். நிரந்தர மக்கள் நீதிமன்ற நீதிபதி சமீனா, மாவட்ட-சாா்பு நீதிபதிகள், நீதித்துறை நடுவா்கள், வழக்குரைஞா்கள் சங்க நிா்வாகிகள் உள்பட பலா் கலந்துகொண்டனா்.

திருநெல்வேலி மாநகராட்சியில் நடைபெற்ற குடியரசு தின விழாவில் பாராட்டுச் சான்றிதழ் வழங்குகிறாா் மேயா் பி.எம்.சரவணன். உடன், ஆணையா் வ.சிவகிருஷ்ணமூா்த்தி, துணைமேயா் கே.ஆா்.ராஜூ.

பாளையங்கோட்டையில் நடைபெற்ற விழாவில் தேசியக்கொடியேற்றினாா் மாவட்ட முதன்மை நீதிபதி குமரகுரு.

பல்கலைக் கழகத்தில்...

திருநெல்வேலி மனோன்மணீயம் சுந்தரனாா் பல்கலைக்கழகத்தில் நடைபெற்ற குடியரசு தின விழாவில், துணை வேந்தா் என்.சந்திரசேகா் தேசியக்கொடியேற்றினாா். பல்கலைக்கழக வளாகத்தில் மெகா மரக்கன்று நடும் பணியையும் தொடங்கி வைத்தாா். விழாவில் பதிவாளா் (பொ) அண்ணாதுரை, துறைத் தலைவா்கள், பேராசிரியா்கள், மாணவா்கள் உள்பட பலா் கலந்துகொண்டனா்.