ராதாபுரம் தொகுதியில் குடிநீா் பஞ்சம்

திருநெல்வேலி மாவட்டம், ராதாபுரம் தொகுதியில் குடிநீா் பஞ்சம் ஏற்பட்டுள்ளதாக அதிமுக சட்ட ஆலோசனைக் குழு உறுப்பினரும், முன்னாள் எம்எல்ஏவுமான ஐ.எஸ். இன்பதுரை தெரிவித்தாா்.

திருநெல்வேலி மாவட்ட ஆட்சியரை திங்கள்கிழமை சந்தித்த ஐ.எஸ்.இன்பதுரை, கூடங்குளம் பகுதியில் குடிநீா் தட்டுப்பாடு நிலவி வருவது குறித்தும், வள்ளியூா் பேருந்து நிலைய கட்டுமானப் பணியை துரிதப்படுத்த வலியுறுத்தியும், வள்ளியூருக்குள் அனைத்து பேருந்துகளும் வந்து செல்ல வேண்டும் எனக் கோரியும் மனு அளித்தாா்.

பின்னா் அவா் செய்தியாளா்களிடம் கூறியதாவது: ராதாபுரம் தொகுதியில் குடிநீா் பஞ்சம் ஏற்பட்டுள்ளது. கூடங்குளத்தில் குடிக்க தண்ணீா் இல்லை. இது தொடா்பாக ஆட்சியரிடம் மனு அளித்தேன். அவரோ புதிய திட்டம் கொண்டு வரப்பட்டுள்ளதாக தெரிவித்தாா். அதை வரவேற்கிறேன். ஆனால் ஏற்கெனவே இருக்கும் குடிநீா் குழாய்களில் இருந்து ஒரு கும்பல் குடிநீரை திருடி விற்பனை செய்து வருகிறது. ராதாபுரம் தொகுதியில் நிலத்தடி நீா் அதலபாதாளத்துக்கு சென்றுள்ளது. ஓடையை ஆக்கிரமித்து சாலை அமைக்கப்பட்டுள்ளது. எனவே, ஆட்சியா் உரிய பாதுகாப்போடு சென்று ஆய்வு செய்ய வேண்டும்.

தமிழகத்தில் சட்டம் -ஒழுங்கு சரியில்லை. கனிமவளம் திருடப்பட்டு வருகிறது. லாரிகளில் மணல் கடத்தப்படுகிறது. அது தொடா்பாக ஆய்வு நடத்தி வருகிறோம்.

மக்களுக்கு குடிநீா் வழங்கப்பட வேண்டும். வள்ளியூா் பேருந்து நிலைய கட்டுமானப் பணியை விரைந்து முடிக்க வேண்டும். அனைத்து பேருந்துகளும் வள்ளியூருக்குள் வந்து செல்ல நடவடிக்கை எடுக்க வேண்டும். இல்லையெனில் போராட்டம் நடத்தப்படும் என்றாா்.