மாஞ்சோலையில் 93 வாக்காளா்களே உள்ள நிலையில் 1,220 பேரின் பெயா்கள் பதிவேற்றம்

திருநெல்வேலி மாவட்டம், மாஞ்சோலையில் 93 வாக்காளா்கள் மட்டுமே உள்ள நிலையில், 1,220 வாக்காளா்களின் பெயா்களை இணையதளத்தில் பதிவேற்றம் செய்தது தொடா்பாக வாக்குச் சாவடி நிலை அலுவலா்களுக்கு சேரன்மகாதேவி சாா் ஆட்சியா் நோட்டீஸ் அனுப்பியுள்ளாா்.

திருநெல்வேலி மாவட்டத்தில் வாக்காளா் பட்டியல் தீவிர சிறப்பு திருத்தப் பணிகள் முழுவீச்சில் நடைபெற்றன.

வாக்குச் சாவடி நிலை அலுவலா்கள் வாக்குச் சாவடி வாரியாக வாக்காளா் கணக்கெடுப்பு விவரங்களை தோ்தல் ஆணையத்தின் செயலியில் பதிவேற்றம் செய்து வருகிறாா்கள்.

இந்நிலையில், திருநெல்வேலி மாவட்டம், அம்பாசமுத்திரம் சட்டப்பேரவைத் தொகுதிக்குள்பட்ட மாஞ்சோலை தேயிலைத் தோட்டப் பகுதிகளான மாஞ்சோலை, ஊத்து, நாலுமுக்கு உள்ளிட்ட பகுதிகளில் 93 வாக்குகளே உள்ள நிலையில், 1,220 வாக்காளா்களின் பெயா்களை வாக்குச் சாவடி அலுவலா்கள் இணையத்தில் பதிவேற்றம் செய்துள்ள விவகாரம் சா்ச்சையை ஏற்படுத்தியுள்ளது.

இது தொடா்பான புகாா்களை அடுத்து, திருநெல்வேலி மாவட்ட தோ்தல் அலுவலரும், ஆட்சியருமான இரா. சுகுமாா், கடந்த சில நாள்களுக்கு முன் மாஞ்சோலை பகுதிக்கு நேரில் சென்று ஆய்வு செய்தாா். அப்போது 93 வாக்காளா்கள் மட்டுமே தங்களது முகவரியில் அங்கு இருப்பது தெரியவந்தது. ஆனால், 1,220 வாக்காளா்களின் பெயா்கள் பதிவேற்றம் செய்யப்பட்டுள்ளதாகக் கூறப்படுகிறது.

இது தொடா்பாக விசாரணை நடத்தி நடவடிக்கை எடுக்க சேரன்மகாதேவி சாா் ஆட்சியா் ஆயுஷ் குப்தாவுக்கு ஆட்சியா் உத்தரவிட்டாா்.

அதைத் தொடா்ந்து விசாரணை நடத்தப்பட்டது.

மாஞ்சோலையிலிருந்து இடம்பெயா்ந்து தற்போது மானூா், உக்கிரன்கோட்டை, தெற்கு பாப்பான்குளம், ரெட்டியாா்பட்டி அடுக்குமாடி குடியிருப்புகளில் வசித்துவரும் நபா்களுக்கு, மாஞ்சோலை பகுதியைச் சோ்ந்த பேரூராட்சி உறுப்பினா் ஒருவா் மொத்தமாக முன் அச்சிடப்பட்ட கணக்கீட்டு படிவங்களை கொடுத்து நிரப்பி, மீண்டும் வாக்குச் சாவடி நிலை அலுவலா்களிடம் கொடுத்ததும், அதை வாக்குச் சாவடி நிலை அலுவலா்கள் தங்களுக்கு வழங்கப்பட்ட செயலியில் பதிவேற்றம் செய்ததும் விசாரணையில் தெரியவந்தது.

இந்நிலையில், இதுதொடா்பாக வாக்குச் சாவடி நிலை அலுவலா்களிடம் விளக்கம் கேட்டு சேரன்மகாதேவி சாா் ஆட்சியா் நோட்டீஸ் அனுப்பியுள்ளாா்.