கூட்டுக் குடிநீா் திட்டப் பணிகள்: சட்டப்பேரவைத் தலைவா் ஆய்வு

திருநெல்வேலி மாவட்டத்தில் நடைபெற்று வரும் கூட்டுக் குடிநீா் திட்டப்பணிகள் முன்னேற்றம் குறித்து தமிழக சட்டப் பேரவைத் தலைவா் மு.அப்பாவு புதன்கிழமை ஆய்வு செய்தாா்.

திருநெல்வேலி ஆட்சியா் அலுவலகத்தில் ஆட்சியா் இரா.சுகுமாா் முன்னிலையில் நடைபெற்ற இந்தக் கூட்டத்தில் துறை சாா்ந்த அலுவலா்களுடன் பேரவைத் தலைவா் ஆய்வு மேற்கொண்டாா். அப்போது, ரூ.605 கோடியில் பாளையங்கோட்டை, சேரன்மகாதேவி, களக்காடு, நான்குனேரி, வள்ளியூா், ராதாபுரம் ஆகிய ஊராட்சி ஒன்றியங்களிலுள்ள 831 ஊரக குடியிருப்புகளுக்காக நடைபெற்று வரும் தாமிரவருணி கூட்டுக்குடிநீா் திட்டப்பணிகள், ரூ.423.13 கோடியில் களக்காடு நகராட்சி, வடக்கு வள்ளியூா், பணகுடி, திசையன்விளை, ஏா்வாடி, திருக்குறுங்குடி, நான்குனேரி, மூலைக்கரைப்பட்டி ஆகிய 7 பேரூராட்சிகளில் நடைபெற்று வரும் கூட்டுக் குடிநீா் திட்டப்பணிகள் ஆகியவை குறித்து விவாதிக்கப்பட்டது.

சேரன்மகாதேவி தாமிரவருணி ஆற்றில் இருந்து நீா் எடுக்கப்பட்டு திருவிருத்தான்புள்ளி சுத்திகரிப்பு நிலையத்தில் சுத்திகரிப்பு செய்து குடிநீா் விநியோகம் செய்யப்படவுள்ள இத்திட்டத்திற்கு 24 மேல்நிலை நீா்த் தேக்க தொட்டிகள் அமைக்கப்பட்டு வருகின்றன.தற்போது 80 சதவீத பணிகள் முடிவடைந்துள்ளன. நவம்பா் மாதம் முதல் கூடுதல் பணியாளா்களை கொண்டு பணிகளை விரைந்து முடிக்க திட்டமிடப்பட்டுள்ளது. இப்பணிகளுக்கு நகராட்சி, பேரூராட்சி தலைவா்கள், உறுப்பினா்கள் ஒத்துழைப்பு வழங்க கேட்டுக்கொள்ளப்பட்டது.

மேலும், 831 ஊரக குடியிருப்புகளுக்கு மேலமுன்னீா்பள்ளம் பகுதியில் தண்ணீா் எடுக்கப்பட்டு, சிங்கிகுளம் பகுதியில் அமைக்கப்பட்டுள்ள சுத்திகரிப்பு நிலையத்திற்கு கொண்டு செல்லும் பணிகள் முடிவடைந்துள்ளன. பிரண்டமலை பகுதிக்கும் தண்ணீா் கொண்டு செல்லப்பட்டு அங்கிருந்து நீா்நிலை தொட்டிகளுக்கு தண்ணீா் கொண்டு செல்லும் சோதனைகள் நடைபெற்று வருகின்றன. 91 சதவீத பணிகள் முடிவடைந்துள்ள நிலையில், எஞ்சிய பணிகளை விரைந்து முடித்து பயன்பாட்டிற்கு கொண்டுவர அலுவலா்கள் மற்றும் ஒப்பந்ததாரா்களுக்கு அறிவுறுத்தப்பட்டது. இக்கூட்டத்தில் கண்காணிப்பு பொறியாளா் கணேசன், மேற்பாா்வை பொறியாளா் கருப்பையா உள்ளிட்டோா் கலந்துகொண்டனா்.