விஜயதசமி: நெல்லை கோயில்களில் குழந்தைகளுடன் சிறப்பு வழிபாடு

விஜயசதமி விழாவையொட்டி, திருநெல்வேலியில் சரஸ்வதி கோயில் உள்ளிட்ட கோயில்களில் பெற்றோா் தங்களது குழந்தைகளுடன் செவ்வாய்க்கிழமை சிறப்பு வழிபாட்டில் ஈடுபட்டனா்.

நவராத்திரி நாள்களில் மிகவும் முக்கியமானதாக விஜயதசமி உள்ளது. ஆதிபராசக்தி சூரனை வதம் செய்த இந்த நாளில் குழந்தைகளின் கல்விக்கு அஸ்திவாரமிடும் வித்யாரம்பம் நிகழ்ச்சிகள் நடைபெறுவது வழக்கம்.

அதன்படி, திருநெல்வேலி அருள்மிகு நெல்லையப்பா்-காந்திமதியம்மன் கோயில், திருநெல்வேலி நகரத்தில் உள்ள சரஸ்வதி சந்நிதிகளில் வித்யாரம்பம் நிகழ்ச்சி செவ்வாய்க்கிழமை நடைபெற்றது.

பெற்றோா் வீட்டில் இருந்து கொண்டுவந்த பச்சரிசி, வாழைப்பழம் உள்ளிட்ட பொருள்களை தாம்பூலங்களில் சந்நிதி முன்பு வைத்து, குழந்தைகளுக்கு மாலையிட்டு அரிசியில் குழந்தைகளின் விரல்களால் ‘அ’ உள்ளிட்ட எழுத்துகளையும், 1 முதல் 11 வரையிலான எண்களையும் எழுதி வழிபட்டனா்.

திருநெல்வேலி சரஸ்வதி கோயிலில் திருநெல்வேலி மாவட்ட ஆட்சியா் ஆனந்த் மோகன் தனது குடும்பத்தினருடன் வழிபட்டாா். பின்னா் தனது குழந்தையை அரிசியில் அ எழுத்த எழுத வைத்ததோடு, தங்க ஊசியால் நாவில் எழுத்துகளை எழுதினாா்.

மாநகரில் கோயில்கள் மட்டுமன்றி பல்வேறு பள்ளிகளிலும் நடைபெற்ற இந்த வித்யாரம்பம் நிகழ்ச்சிகளில் ஏராளமானோா் கலந்துகொண்டனா்.