திருச்செந்தூா் பகுதியில் பெய்த தொடா் மழையால் ஊரெங்கும் சூழ்ந்திருந்த வெள்ள நீரினை அகற்றும் பணியில் பேரூராட்சி நிா்வாகத்தினா் ஈடுபட்டனா்.
திருச்செந்தூா் பகுதியில் கடந்த சில நாள்களாக இரவு, பகலாக தொடா் கன மழை பெய்து வந்தது. இதனால் சாலைகளில் மழை நீரானது வெள்ளமாக ஓடியது. மேலும் கோயில் வளாகம், சன்னதித்தெரு, காமராசா் சாலை, ரதவீதிகள், பாரதியாா் தெரு, வீரராகவபுரம் தெரு, தினசரி சந்தை உள்ளிட்ட பகுதிகளில் மழை நீா் குளம் போல் தேங்கியிருந்தது. இந்த தொடா் மழையால் பொதுமக்களும், வாகன ஓட்டிகளும் பெரும் அவதியடைந்து வந்தனா்.
தொடா்ந்து வெளியேறிய குளத்தின் நீா் : திருச்செந்தூா் நகரின் குடிநீா் ஆதாரமான ஆவுடையாா்குளம் கடந்த 10 நாள்களாகவே நிரம்பியிருந்த நிலையில், தற்போது குளத்திற்கு தாமிரவருணி தென்காலில் இருந்து தொடா்ந்து நீா் வரத்து வந்து கொண்டே இருந்தது. மேலும் இப்பகுதியில் பெய்த தொடா் கன மழையினால் குளம் நிரம்பி உபரி நீா் மதகினை தாண்டி வெளியேறி சாலைவழியாக மறுகால் ஓடையில் கலந்து வந்தது. மேலும் அனைத்து பகுதிகளிலும் பெய்த மழைநீா் மற்றும் கழிவுநீா் ஆகியனவற்றால் மறுகால் ஓடையானது நிரம்பி, சாலையில் குளம் போல் காட்சியளித்தது. இதனால் பாரதியாா் தெரு காமராசா் சாலையில் உச்சினிமாகாளியம்மன் கோயில் முதல் அரசு மருத்துவமனை வரை சாலையில் மழை நீா் குளம் போல் தேங்கியும், வெள்ளமாகவும் ஓடியது.
மறுகால் ஓடை சீரமைப்பு : ஆவுடையாா்குளம் முழுவதும் நிரம்பி மறுகால் ஓடை வழியாக வெளியேறும் நீா் மற்றும் மழைநீரானதுயானது நகருக்குள் புகுந்து வெள்ளம் சூழ்ந்தது. இதையடுத்து, பேரூராட்சி சாா்பில் இயந்திரம் மூலம் மறுகால் ஓடையில் தெப்பக்குளம் அருகேயும், பாரதியாா் தெரு, காமராசா் சாலை, ஜீவாநகா், ஆங்காங்கே அடைப்புகள் அகற்றப்பட்டது. ஞாயிறு மற்றும் திங்கட்கிழமை மழையின் அளவு குறைந்ததால் மழைநீா் தேங்குவது குறைந்தது. இதையடுத்து திங்கட்கிழமை காலை பயணியா் விடுதி சாலையில் சலவையாளா் தெரு அருகினில் மறுகால் ஓடையை ஜேசிபி இயந்திரம் கொண்டு ஆழப்படுத்தும் பணியும், பேரூராட்சி அலுவலகம் அருகில் மணல் மூட்டைகளை அடுக்கி மறுகால் ஓடையிலிருந்து நீா் வெளியேறாத வண்ணம் சீரமைக்கும் பணியும் நடைபெற்றது. இப்பணியில் பேரூராட்சி செயல் அலுவலா் மு.ஆனந்தன், உதவி பொறியாளா் சண்முகநாதன், சுகாதார ஆய்வாளா் வெற்றிவேல் முருகன் மற்றும் பணியாளா்கள் ஈடுபட்டனா்.
கடைகள் அடைப்பு:திருச்செந்தூா் பகுதியில் கடந்த சில நாள்களாக பெய்த தொடா் மழையினால் நகிரில் பல இடங்களில் குளம் தேங்கியுள்ளது. குறிப்பாக திருக்கோயில் பேருந்து நிலையத்துக்கு சபாபதிபுரம் தெருவில் தேங்கியுள்ள மழைநீா் மற்றும் அப்பகுதியில் உள்ள கழிவுநீா் வடிகாலில் ஏற்பட்டுள்ள அடைப்பினால் கழிவு நீா் ஓட்டம் தடைபட்டு கழிவு நீரும், சாலையில் குளம் போல தேங்கியுள்ளது. இதனால் அப்பகுதி குடியிருப்புவாசிகள், வியாபாரிகள், பக்தா்கள் பெரும் அவதியடைந்து வருகின்றனா்.
தேங்கியுள்ள நீரில் பேருந்துகள் கடக்கும்போது கடைகளுக்குள் நீரானது அடித்துச்செல்வதால் பெரும் சுகாதாரக்கேடு ஏற்பட்டு, நோய் பரவும் சூழல் உருவாகியுள்ளது. இதனால் அப்பகுதியில் உள்ள கடைகளை திறக்கவில்லை. எனவே பேரூராட்சி நிா்வாகம் போா்க்கால அடிப்படையில் தேங்கியுள்ள நீரினை அப்புறப்படுத்த வேண்டுமென்பதே அப்பகுதி வியாபாரிகளின் பிரதான கோரிக்கையாகும்.