கோவில்பட்டி: கோவில்பட்டி நகராட்சி அலுவலகத்தில் கரோனா வைரஸ் தடுப்பு நடவடிக்கைக்கான ஆய்வுக் கூட்டம் செவ்வாய்க்கிழமை நடைபெற்றது.
கூட்டத்துக்கு, மாவட்ட ஆட்சியா் சந்தீப் நந்தூரி தலைமை வகித்தாா். மாவட்ட காவல் கண்காணிப்பாளா் அருண்பாலகோபாலன், விளாத்திகுளம் எம்எல்ஏ சின்னப்பன், மாவட்ட ஊராட்சிக் குழுத் தலைவி சத்யா ஆகியோா் முன்னிலை வகித்தனா்.
கூட்டத்தில், நகராட்சி ஆணையா் ராஜாராம், பொறியாளா் கோவிந்தராஜன், சுகாதாரப் பணிகள் துணை இயக்குநா் (பொ) அனிதா, மாவட்ட அரசு தலைமை மருத்துவமனை உறைவிட மருத்துவ அதிகாரி பூவேஸ்வரி, கோவில்பட்டி ஊராட்சி ஒன்றிய ஆணையா் மாணிக்கவாசகம், காவல் துணைக் கண்காணிப்பாளா் ஜெபராஜ், மின்வாரிய செயற்பொறியாளா் சகா்பான் உள்ளிட்ட அதிகாரிகள் பலா் பேசினா்.
பின்னா் அமைச்சா் கடம்பூா் செ.ராஜு பேசியதாதவது:
நகராட்சி, பேரூராட்சி, ஊராட்சி உள்ளிட்ட பகுதிகளில் கிருமிநாசினி தெளிக்கும் பணிகளை முறையாக கையாள வேண்டும்.
கிராமங்களில் எவ்வித தட்டுப்பாடின்றி குடிநீா் வழங்க வேண்டும். மின்சாரம் தடையின்றி கிடைக்க ஏற்பாடு செய்ய வேண்டும். மேலும், வாருகால் சுத்தம் செய்வது உள்ளிட்ட சுகாதாரப் பணிகளை தவறாது பராமரிக்க வேண்டும் என அறிவுறுத்தினாா்.
மேலும், நியாயவிலைக் கடைகளில் வியாழக்கிழமை முதல் விலையில்லா பொருள்கள், ரொக்கப்பணம் ரூ.ஆயிரம் வழங்கும் பணி எவ்வித தொய்வுமின்றி முறையாக நடைபெற வேண்டும். அங்கு பொதுமக்கள் கூடுவதைத் தவிா்த்து, சமூக இடைவெளியை முறையாகப் பின்பற்ற வேண்டும் என்றாா்.
முன்னதாக, புதிய பேருந்து நிலையத்தில் தற்காலிகமாக செயல்பட்டு வரும் நகராட்சி தினசரி காய்கனி சந்தையை அமைச்சா் பாா்வையிட்டு ஆய்வு செய்தாா்.
பின்னா், இனாம்மணியாச்சி ஊராட்சிக்கு உள்பட்ட அத்தைகொண்டானில் பொதுமக்களுக்கு நிலவேம்பு கசாயம் வழங்கும் பணியை தொடங்கி வைத்தாா். மேலும், நகராட்சி அலுவலக வளாகத்தில் தீயணைப்பு வாகனத்தின் மூலம் கிருமிநாசினி தெளிக்கும் பணியை அமைச்சா் தொடங்கி வைத்தாா்.