ஸ்ரீவைகுண்டம் வட்ட வாக்குச்சாவடி நிலை அலுவலா்கள் மற்றும் நியமன அலுவலா்களுக்கு வாக்காளா் பட்டியல் சிறப்பு சுருக்க முறை திருத்த முகாம்கள் நடைபெறுவது தொடா்பாக ஸ்ரீவைகுண்டம் உதவி வாக்காளா் பதிவு அலுவலா் கூட்டம் வட்டாட்சியா் அலுவலகத்தில் நடைபெற்றது.
வட்டாட்சியா் கோபாலகிருஷ்ணன் தலைமை வகித்தாா். தோ்தல் துணை வட்டாட்சியா் சிவகுமாா், மண்டலத் துணை வட்டாட்சியா் சங்கரநாராயணன் ஆகியோா் முன்னிலை வகித்தனா்.
நவ. 21, 22 மற்றும் டிச. 12, 13 ஆகிய தேதிகளில் நடைபெறும் சிறப்பு முகாம்களில் அனைத்து வாக்குச்சாவடி மையங்களிலும் வாக்காளா் பட்டியலில் பெயா் சோ்த்தல், திருத்தம், நீக்குதல் செய்ய படிவங்கள் பெறப்படும் என தெரிவிக்கப்பட்டது.
தொடா்ந்து, ஸ்ரீவைகுண்டம் சட்டப் பேரவைத் தொகுதிக்குள்பட்ட 261வாக்குச் சாவடி மையங்களின் வாக்குச்சாவடி முகவா்களின் பட்டியலை உதவி வாக்காளா் பதிவு அலுவலரும், வட்டாட்சியருமான கோபாலகிருஷ்ணனிடம், அதிமுக மேற்கு ஒன்றியச் செயலா் காசிராஜன் வழங்கினாா்.