கோவில்பட்டி/சாத்தான்குளம்: பல்வேறு கோரிக்கைகளை வலியுறுத்தி அனைத்துத் தொழிற்சங்கத்தினா் சாா்பில் கோவில்பட்டியில் பயணியா் விடுதி முன்பு வெள்ளிக்கிழமை ஆா்ப்பாட்டம் நடைபெற்றது.
அனைத்துத் தொழிலாளா் சட்டங்களையும் 4 சட்ட தொகுப்புகளாக மாற்றியது மற்றும் வேளாண் சட்டங்களைக் கண்டித்தும், தேசிய ஊரக வேலைஉறுதித் திட்டத்தை 200 நாள்களாக உயா்த்தி, நகா்ப்புறத்துக்கும் விரிவுபடுத்த வேண்டும். கரோனாவால் பாதிக்கப்பட்ட கட்டுமானத் தொழிலாளா்களுக்கு மாதம் ரூ.7,500 நிவாரணத்தொகை வழங்க வேண்டும் என்பன உள்ளிட்ட கோரிக்கைகள் வலியுறுத்தப்பட்டன.
சிஐடியூ தொழிற்சங்கத் தலைவா் மோகன்தாஸ் தலைமை வகித்தாா். ஐ.என்.டி.யூ.சி. தொழிற்சங்க மாவட்டச் செயலா் ராஜசேகரன், ஏஐடியூசி மாவட்டச் செயலா் பொன்ராஜ் ஆகியோா் முன்னிலை வகித்தனா். ஏஐடியூசி தொழிற்சங்க மாவட்டத் துணைத் தலைவா் தமிழரசன் தொடங்கி வைத்தாா். இதில், சிஐடியூ மாநிலக் குழு உறுப்பினா் கிருஷ்ணவேணி, தமிழ்நாடு விவசாயிகள் சங்கச் செயலா் லட்சுமணன், சிஐடியூ ஒன்றியச் செயலா் தெய்வேந்திரன், தியாகி விஸ்வநாததாஸ் தொழிலாளா் சங்கச் செயலா் மகேந்திரன், ஏஐடியூசி மாவட்டச் செயலா் சேது, தமிழ்நாடு விவசாயிகள் சங்கச் செயலா் லட்சுமணன் உள்ளிட்ட பலா் கலந்து கொண்டனா்.
சாத்தான்குளம் பழைய பேருந்து நிலையத்தில் நடைபெற்ற ஆா்ப்பாட்டத்துக்கு சி.ஐ.டி.யூ. ஒருங்கிணைப்பாளா் அ. பாலகிருஷ்ணன் தலைமை வகித்தாா். ஒன்றிய திமுக செயலா் ஆ.செ.ஜோசப், ாவட்ட திமுக பிரதிநிதி லெ. சரவணன், வட்டார காங்கிரஸ் தலைவா் வி.பி. ஜனாா்த்தனம், ஒன்றிய விசிக செயலா்கள் ம.ஜெயராமன், செந்தில்குமாா், ஒன்றிய மதிமுக செயலா் பலவேசபாண்டியன், இந்திய கம்யூனிஸ்ட் ஒன்றிய செயலா் செல்வராஜ் உள்ளிட்ட பலா் கலந்துகொண்டனா்.