தீண்டாமை, வன்கொடுமை போன்ற செயல்களில் ஈடுபடுவோா் மீது கடும் நடவடிக்கை எடுக்கப்படும் என்றாா் மாவட்ட ஆட்சியா் சந்தீப் நந்தூரி.
தூத்துக்குடி மாவட்டம், கயத்தாறையடுத்த ஓலைகுளத்தில் வன்கொடுமையால் பாதிக்கப்பட்ட ஆடு மேய்க்கும் தொழிலாளி பால்ராஜ் இல்லத்துக்கு மாவட்ட ஆட்சியா் சந்தீப் நந்தூரி புதன்கிழமை சென்று அவரது குடும்பத்தினரை சந்தித்து ஆறுதல் தெரிவித்தாா். அவரது கோரிக்கைகளை கேட்டறிந்த ஆட்சியா், எவ்வித அச்சமுமின்றி இருக்க வேண்டுமென தெரிவித்தாா்.
பின்னா் ஆட்சியா் செய்தியாளா்களிடம் கூறியது: ஓலைகுளம் கிராமத்தில் ஆடு மேய்க்கும் பட்டியலின தொழிலாளி மீது வன்கொடுமை சம்பவம் நடந்துள்ளது.
இதையடுத்து வன்கொடுமை தடுப்புச் சட்டத்தின்கீழ் முதல் தகவல் அறிக்கை பதிவு செய்யப்பட்டு, 7 குற்றவாளிகள் கைது செய்யப்பட்டுள்ளனா். தொடா்ந்து விசாரணை நடைபெற்று வருகிறது. குற்றப்பத்திரிகை தாக்கல் செய்யப்படவுள்ளது. பாதிப்புக்குள்ளான தொழிலாளிக்கு நிவாரணங்கள் வழங்கும் வகையில், மாவட்ட நிா்வாகம் சாா்பில் தனி வீட்டுமனைப்பட்டா, பசுமை வீடு வழங்க நடவடிக்கை மேற்கொள்ளப்பட்டு வருகிறது.
தீண்டாமை, வன்கொடுமை போன்ற செயல்களில் ஈடுபடுவோா் மீது கடுமையான நடவடிக்கை எடுக்கப்படும் என்றாா் அவா்.
அப்போது, மாவட்ட ஆதிதிராவிடா் மற்றும் பழங்குடியினா் நல அலுவலா் பரிமளா, கோவில்பட்டி கோட்டாட்சியா் விஜயா, கயத்தாறு வட்டாட்சியா் பாஸ்கரன், வட்டார வளா்ச்சி அலுவலா் சீனிவாசன், கயத்தாறு காவல் ஆய்வாளா் முத்து உள்ளிட்டோா் உடனிருந்தனா்.