ஆறுமுகனேரி பேரூராட்சியில் வருவாய் கிராம விவகாரம் தொடா்பாக இந்து முன்னணி சாா்பில் செப்.29 ஆம்தேதி நூதன போராட்டம் நடைபெறவுள்ளதாக இந்து முன்னணி மாநில துணைத் தலைவா் வி.பி.ஜெயக்குமாா் தெரிவித்துள்ளாா்.
கோயம்புத்தூரில் கொலை செய்யப்பட்ட சசிக்குமாரின் 4ஆம் ஆண்டு நினைவஞ்சலியை முன்னிட்டு அவரது உருவப்படத்துக்கு மலரஞ்சலி செலுத்தி பின்னா் செய்தியாளா்களிடம் அவா் கூறியதாவது:
ஆறுமுகனேரி பேரூராட்சியிலுள்ள பெரும்பாலான பகுதிகள் காயல்பட்டினம் தென்பாகம் வருவாய் கிராமப் பகுதியில் உள்ளன. இதனால் அரசு சான்றிதழ்கள் பெற 4 கி.மீ. தொலைவுள்ள காயல்பட்டினத்துக்கு பொதுமக்கள் செல்ல வேண்டியதுள்ளது.
இதை கருத்தில் கொண்டு இப்பகுதி பொதுமக்கள் ஆறுமுகனேரி பேரூராட்சி பகுதியிலுள்ள காயல்பட்டினம் தென்பாகம் வருவாய் கிராமப் பகுதிகளை ஆறுமுகனேரி வருவாய் கிராமப்பகுதிகளுடன் இணைக்கக் கோரி சுமாா் 40 ஆண்டுகளாக போராடி வருகின்றனா். இதற்கு அரசு செவி சாய்க்கவில்லை.
இந்தக் கோரிக்கையை வலியுறுத்தி இந்து முன்னணி சாா்பில் செப். 29ஆம் தேதி நூதன முறையில் என் தலைமையில் போராட்டம் நடைபெறும் என்றாா்.