திருச்செந்தூா்: திருச்செந்தூா் அருள்மிகு சுப்பிரமணியசுவாமி திருக்கோயிலில் ரூ. 150 கோடியில் அடிப்படை வசதிகள் செய்யப்படும் என்றாா் அறநிலையத் துறை அமைச்சா் பி.கே. சேகா்பாபு.
திருச்செந்தூா் அருள்மிகு சுப்பிரமணியசுவாமி திருக்கோயிலில் ஆய்வு மேற்கொள்ள இந்து சமய அறநிலையத் துறை அமைச்சா் பி.கே.சேகா்பாபு, மீன்வளம், மீனவா் நலன் மற்றும் கால்நடை பராமரிப்புத் துறை அமைச்சா் அனிதா ஆா்.ராதாகிருஷ்ணன் ஆகியோா் செவ்வாய்க்கிழமை வந்தனா்.
அப்போது, தரிசனத்துக்காக வரிசையில் காத்திருந்த பக்தா்களிடம் கோயிலில் பக்தா்களின் தேவை குறித்து அமைச்சா் சேகா்பாபு கேட்டறிந்தாா்.
அதன் பின்னா் செய்தியாளா்களிடம் அவா் கூறியது:
இக்கோயிலில் தரிசனத்துக்கு வரும் பக்தா்கள் பல்வேறு புகாா்களை தெரிவித்துள்ளனா். அதனடிப்படையில் கோயிலில் அடிப்படை வசதிகளை நிவா்த்தி செய்ய நடவடிக்கை எடுக்கப்படும். இதற்காக வரைவுத் திட்டம் தயாா் செய்யப்பட்டு தனியாா் மற்றும் அறநிலையத்துறை பங்களிப்புடன் ரூ. 150 கோடி செலவில் புனரமைப்பு பணிகள், குடிநீா், கழிப்பிட வசதிகள், தங்குமிடங்கள் உள்ளிட்ட பல்வேறு அடிப்படை வசதிகள் செய்யப்படவுள்ளன. இதற்கான ஆய்வு ஏற்கெனவே மேற்கொள்ளப்பட்டுள்ளது. இதில், சில மாற்றங்களை செய்ய மீண்டும் அதிகாரிகளுடன் ஆய்வுக் கூட்டம் நடத்தப்படும். பின்னா் முதல்வரின் உத்தரவை பெற்று இதற்கான பணிகள் விரைவில் தொடங்கும்.
இக்கோயிலில் முக்கிய பிரமுகா்கள் தரிசனத்தை கட்டுப்படுத்த மாவட்ட ஆட்சியருக்கு உத்தரவிடப்பட்டுள்ளது. மேலும் கோயிலில் பக்தா்கள் தரிசனம் செய்வதில் இடையூறு ஏற்படுவதை தவிா்க்க ஷிப்ட் முறையில் அா்ச்சகா்களை அனுமதிக்க நடவடிக்கை எடுக்கப்படும். இதனால் பக்தா்கள் அதிக நேரம் வரிசையில் காத்திருப்பது தவிா்க்கப்படும்.
பக்தா்களின் வசதி கருதி திருச்செந்தூா், திருத்தணி, சமயபுரம் ஆகிய கோயில்களில் வியாழக்கிழமை (செப். 16) முதல்
முழு நேர அன்னதான திட்டத்தை தமிழக முதல்வா் காணொலிக் காட்சி மூலம் தொடங்கி வைக்க உள்ளாா்.
கடந்த 4-ஆம் தேதி வரை சுமாா் ரூ. 642 கோடி மதிப்புள்ள கோயில் சொத்துகள் மீட்கப்பட்டுள்ளது. தற்போது அது
ரூ. 900 கோடியை தாண்டியுள்ளது. நாங்கள் கூறிய இலக்கை விட கூடுதலாக மீட்கப்படும்.
தமிழகம் முழுவதும் 12 ஆண்டுகள் கடந்து குடமுழுக்கு செய்யப்படாத கோயில்களைக் கண்டறிந்து குடமுழுக்கு செய்ய நடவடிக்கை எடுக்கப்படும். விளாத்திகுளத்தில் இந்து சமய அறநிலையத் துறை சாா்பில், அரசு கலைக் கல்லூரி அமைப்பதற்கான அடிப்படை பணிகள் தொடங்கியுள்ளன. திருச்செந்தூரில் கடந்த ஆட்சியில் மூடு விழா நடந்த அா்ச்சகா் பயிற்சிப் பள்ளி மீண்டும் நவீன வசதிகளுடன், திறமையான ஆசிரியா்களால் தொடங்கப்படும் என்றாா் அவா்.
ஆய்வின் போது, அறநிலையத் துறை ஆணையா் குமரகுருபரன், மாவட்ட ஆட்சியா் கி.செந்தில்ராஜ், உதவி ஆட்சியா் (பயிற்சி) ஸ்ருதஞ்ஜெய் நாராயணன், கோட்டாட்சியா் மு.கோகிலா, உதவி காவல் கண்காணிப்பாளா் ஹா்ஷ்சிங், வட்டாட்சியா் (பொ) ராமச்சந்திரன், திருக்கோயில் இணை ஆணையா் (பொ) ம.அன்புமணி, உதவி ஆணையா் வே.செல்வராஜ், கண்காணிப்பாளா்கள் ஆனந்த், ராமசுப்பிரமணியன், மாரிமுத்து, ராஜ்மோகன் உள்ளிட்டோா் உடனிருந்தனா்.