தேசிய அஞ்சல் ஊழியா் சங்க கோட்ட மாநாடு கோவில்பட்டி தலைமை அஞ்சல் அலுவலக வளாகத்தில் ஞாயிற்றுக்கிழமை நடைபெற்றது.
இம்மாநாட்டுக்கு தேசிய அஞ்சல் ஊழியா் சங்க (குரூப் சி) கோட்டத் தலைவா் பாலசுப்பிரமணியன் தலைமை வகித்தாா். கோட்ட உதவிச் செயலா் (குரூப் சி) ரெஜினா ஜாக்குலின் வரவேற்றாா்.
முன்னாள் தமிழ் மாநிலச் செயலா் உதயகுமாரன், மத்திய மண்டலச் செயலா் சுதீஷ்குமாா், தென்மண்டலச் செயலா் ஆறுமுகம், மாநில உதவிச் செயலா் (கிராமப்புற அஞ்சல்) செல்வராஜ் ஆகியோா் பேசினா். முன்னதாக, முன்னாள் மாநில உதவித் தலைவா் (குரூப் சி) மாரிமுத்து சங்கக் கொடியேற்றினாா்.
மாநாட்டில் தேசிய அஞ்சல் ஊழியா் சங்கத்தின் குரூப் சி, தபால்காரா், கிராமப்புற அஞ்சல் ஊழியா்கள் உள்பட சங்க உறுப்பினா்கள் திரளானோா் கலந்து கொண்டனா்.
தீா்மானங்கள்: புதிய ஓய்வூதியத் திட்டத்தை ரத்து செய்ய வேண்டும்; பணியில் இருக்கும்போது உயிரிழந்த ஊழியா்களின் வாரிசுகளுக்கு எவ்வித நிபந்தனையுமின்றி வேலை வழங்க வேண்டும்; பணியிட மாற்றங்களில் பெண்களுக்கு சில விதிவிலக்குகள் அளிக்க வேண்டும்.
அனைத்து காலிப் பணியிடங்களையும் நிரப்ப வேண்டும்; வாரத்தில் 5 நாள்கள் வேலை திட்டத்தை அனைத்து அஞ்சலக ஊழியா்களுக்கும் அமல்படுத்த வேண்டும் என்பன உள்ளிட்ட பல்வேறு தீா்மானங்கள் நிறைவேற்றப்பட்டன.