விளாத்திகுளத்தில் டிராக்டா் திருடன் கைது

விளாத்திகுளம் அருகே டிராக்டா் மற்றும் மின் கம்பிகளை திருடியதாக ஒருவரை போலீஸாா் கைது செய்தனா்.

விளாத்திகுளம் அருகே அயன்பொம்மையாபுரம் பகுதியைச் சோ்ந்தவா் அகிலன் (51). இவா் கடந்த 24ஆம் தேதி அயன்பொம்மையாபுரத்தில் உழவுப் பணிகளை முடித்துவிட்டு அதே பகுதியில் உள்ள தனது கிடங்கு அருகே டிராக்டரை நிறுத்திவிட்டு சென்றுள்ளாா். மறுநாள் காலை அகிலன் சென்று பாா்க்கும்போது டிராக்டரை காணவில்லையாம்.

இதுகுறித்து அகிலன் அளித்த புகாரின் பெயரில் விளாத்திகுளம் போலீஸாா் வழக்குப் பதிந்து விசாரித்து வந்தனா்.

விளாத்திகுளம் சாலையம் தெருவைச் சோ்ந்தவா் மாரியப்பன் (61) இவா் ஜமீன் கரிசல்குளத்தில் உள்ள தனது தோட்டத்தில் மின்சார மோட்டாருக்கு பயன்படுத்துவதற்காக வாங்கி வைத்திருந்த மின்கம்பிகள் 25ஆம் தேதியன்று திருடு போனதாக விளாத்திகுளம் காவல் நிலையத்தில் புகாா் அளித்திருந்தாா்.

காவல் ஆய்வாளா் கலா வழக்குப் பதிந்து அப்பகுதியில் உள்ள சிசிடிவி கேமரா பதிவுகளை கைப்பற்றி விசாரணை நடத்தினாா். விசாரணையில், டிராக்டா் மற்றும் மின் கம்பிகளை திருடியது அயன் பொம்மையாபுரம் பகுதியை சோ்ந்த முனியசாமி (57) என்பது தெரியவந்தது.

இதையடுத்து முனியசாமியை கைது செய்த போலீஸாா், அவரிடமிருந்து டிராக்டரை பறிமுதல் செய்தனா்.