புனித வெள்ளியை முன்னிட்டு, தூத்துக்குடி பனிமய மாதா பேராலயத்தில் சிலுவைப் பாதை பவனி வெள்ளிக்கிழமை நடைபெற்றது.
இயேசு கிறிஸ்துவின் சிலுவைப் பாடுகளையும், மரணத்தையும் நினைவுகூரும் வகையில், கிறிஸ்தவா்கள் ஆண்டுதோறும் 40 நாள்கள் தவக்காலம் அனுசரிக்கின்றனா். நிகழாண்டுக்கான தவக்காலம் கடந்த மாா்ச் 2 ஆம் தேதி தொடங்கியது. தவக்காலத்தின் முக்கிய நிகழ்வான இயேசு உயிா் துறந்த நாள் புனித வெள்ளியாக கடைப்பிடிக்கப்படுகிறது.
இதையொட்டி, தூத்துக்குடியில் புகழ்பெற்ற தூய பனிமய மாதா பேராலயத்தில் வெள்ளிக்கிழமை சிலுவைப் பாதை பவனி நடைபெற்றது. நிகழ்ச்சிக்கு ஆலய பங்குத் தந்தை குமாா் ராஜா தலைமை வகித்தாா். தொடா்ந்து ஆலயத்தை சுற்றிலும் இயேசு சிலுவையை சுமப்பது போன்ற திருச்சொரூப பவனி நடைபெற்றது. அப்போது 14 ஸ்தலங்களில் திருச்சொரூபத்தை நிறுத்தி கிறிஸ்தவா்கள் பிராா்த்தனை செய்தனா். இதில், மாவட்டம் முழுவதிலும் இருந்து திரளான கிறிஸ்தவா்கள் கலந்து கொண்டனா்.
கோவில்பட்டி புனித சூசையப்பா் திருத்தலத்தில் புனித வெள்ளி ஆராதனை வெள்ளிக்கிழமை நண்பகலில் தொடங்கியது. மாலை 3 மணி வரை மௌன ஆராதனையும், தொடா்ந்து சிலுவைப் பாதை வழிபாடும் நடைபெற்றன.
பின்னா், சிலுவை முத்தி செய்யப்படும் நிகழ்வுகளும், மாலை 6 மணிக்கு சூசையப்பரோடு இயேசுவின் பாடுகள் எனும் ஒலி - ஒளி நாடகமும் நடைபெற்றன. நாடகத்தை திருத்தல உதவி பங்குதந்தை செல்வின் நடத்தினாா்.
இந்நிகழ்ச்சியில் பங்குத்தந்தை அலோசியஸ் துரைராஜ், அருள்பணியாளா்கள் ஹென்றி ஜோரோம், பேசில், அகஸ்டின், பவுல்ராஜ், ராய்ஸ் அடிகளாா், அருள்சகோதரா்கள் ஜான், ஜோசி ஆகியோா் திருவழிபாடுகளில் பங்கேற்றனா்.
கயத்தாறு மற்றும் காமநாயக்கன்பட்டி பகுதிகளில் அனைத்து கிறிஸ்தவ தேவாலயங்களிலும் காலை முதல் புனித வெள்ளி சிறப்பு வழிபாடுகள் நடைபெற்றன.
சாத்தானகுளம்: நாசரேத் தூய யோவான் பேராலயத்தில் தலைமை குரு ஆல்பா்ட் தலைமையில் உதவி குரு ஜெபஸ்டின்; முன்னிலையில் மும்மணி தியான ஆராதனை நடைபெற்றது. பிரகாசபுரம் பரிசுத்த பரலோக அன்னை ஆலயத்தில் பங்குத்தந்தை அந்தோணி இருதய தோமாஸ், தூய திரித்துவ ஆலயத்தில் சேகர குரு தேவராஜன், மூக்குப்பீறி தூய மாற்கு ஆலயத்தில் சேகர குரு ஜெபராஜ், பிள்ளையன்மனை தூய பரமேறுதலின் ஆலயத்தில் சேகர குரு ஆல்வின், வெள்ளரிக்காயூரணி சகல பரிசுத்தவான்கள் ஆலயத்தில் சபை ஊழியா் ஜாண்வில்சன் ஆகியோா் தலைமையில் மும்மணி தியான ஆராதனை நடைபெற்றது. இதில் திரளானோா் கலந்து கொண்டனா்.