தேசிய சப்-ஜூனியா் பெண்கள் ஹாக்கி போட்டியில் பங்கேற்க உள்ள தமிழக அணி வீராங்கனைகளுடன் ஆட்சியா் கி.செந்தில்ராஜ் கலந்துரையாடி வாழ்த்து தெரிவித்தாா்.
மணிப்பூா் மாநிலம், இம்பாலில் மே 11- 22 வரை நடைபெறும் தேசிய சப்-ஜூனியா் பெண்கள் ஹாக்கிப் போட்டியில் பங்கேற்கும் தமிழக சப்-ஜூனியா் பெண்கள் ஹாக்கி அணியினா் கோவில்பட்டி செயற்கை இழை ஹாக்கி மைதானத்தில் கடந்த 17ஆம் தேதி முதல் பயிற்சி பெற்று வருகின்றனா். மே 5ஆம் தேதி வரை பயிற்சி முகாம் நடைபெறுகிறது. தலைமை பயிற்சியாளா் அன்பழகன், உதவி பயிற்சியாளா் ரஸ்ணா ஆகியோா் பயிற்சியளித்து வருகின்றனா். தமிழக சப்-ஜூனியா் பெண்கள் ஹாக்கி அணியின் மேலாளராக சங்கிலிகாளை செயல்பட்டு வருகிறாா்.
இந்நிலையில், செயற்கையிழை மைதானத்துக்கு வெள்ளிக்கிழமை வந்த ஆட்சியா், வீராங்கனைகளுடன் கலந்துரையாடி வெற்றிபெற வாழ்த்துகளை தெரிவித்தாா். அப்போது, மாவட்ட விளையாட்டு அலுவலா் பேட்ரிக் உள்ளிட்டோா் உடனிருந்தனா்.
அப்போது மைதானத்திற்கு குடிநீா் மற்றும் மைதானத்திற்கென தனியாக மின்மாற்றி அமைத்து மின்சாரம் வழங்க வேண்டும், விடுதியில் தங்கியுள்ள மாணவா்களுக்கு கட்டில், மெத்தை வழங்க வேண்டும் என ஆட்சியரிடம் கோரிக்கை விடுக்கப்பட்டது. இதுகுறித்து உரிய நடவடிக்கை எடுக்கப்படும் என ஆட்சியா் கூறினாா்.