பெண்களுக்கு முழுப் பாதுகாப்பு அளிக்கும் ஒரே கட்சி அதிமுகதான் என கோவை வடக்குத் தொகுதி அதிமுக வேட்பாளா் அம்மன் கே.அா்ச்சுணன் தெரிவித்தாா்.
கோவை வடக்குத் தொகுதிக்கு உள்பட்ட சங்கனூா் தொகுதியில் சனிக்கிழமை பிரசாரம் மேற்கொண்ட அவா் பேசியதாவது:
கடவுள் மறுப்புக் கொள்கையில் திமுக தலைவா் ஸ்டாலின் இரட்டை வேடம் போடுகிறாா். அவரது குடும்பத்தினா் கோயில்களில் சுவாமி கும்பிட்டு வருகின்றனா். ஆனால், ஸ்டாலின் ஹிந்துக் கடவுள்களை இழிவாகப் பேசி வருகிறாா். அதுமட்டுமின்றி, திமுகவில் உள்ள நீலகிரி எம்.பி. ஆ.ராசா, லியோனி போன்றோா்கள் பெண்களை இழிவாகப் பேசி வருகின்றனா்.
ஆட்சியில் இல்லாத போதே பெண்களை இழிவாகப் பேசுகிறாா்கள். ஆட்சிக்கு வந்தால் நிலைமை என்னவாகும் என்பதை மக்கள் சிந்தித்து பாா்க்க வேண்டும். பெண்களுக்கு முழுப் பாதுகாப்பு அளிக்கும் ஒரே கட்சி அதிமுகதான். அதற்கு கடந்த 10 ஆண்டு கால ஆட்சியே சாட்சி என்றாா்.
பிரசாரத்தில் அதிமுக நிா்வாகிகள், கூட்டணிக் கட்சியினா் பலரும் உடனிருந்தனா். இதைத் தொடா்ந்து, கணபதி பேருந்து நிறுத்தம் அருகே அமைச்சா் எஸ்.பி.வேலுமணி, அம்மன் கே.அா்ச்சுணனை ஆதரித்து சனிக்கிழமை மாலை வாக்கு சேகரிப்பில் ஈடுபட்டாா்.