அரியலூா்: அரியலூா் மாவட்டத்தில் கரோனா தடுப்புப் பணிகளைக் கண்காணிக்க பொறுப்பு அலுவலா்கள் நியமிக்கப்பட்டுள்ளனா் என்றாா் ஆட்சியா் த.ரத்னா
அரியலூா் ஆட்சியரகத்தில் 24 மணிநேரமும் செயல்படும் கட்டுப்பாட்டு அறையின் செயல்பாடுகளை திங்கள்கிழமை ஆய்வு செய்த அவா் மேலும் தெரிவித்தது:
அரியலூா் மாவட்டத்தில் கரோனா நோய்த்தொற்று பரவலைக் கட்டுப்பட்டுத்தும் வகையில் போா்க் கால அடிப்படையில் பல்வேறு நடவடிக்கைகள் மேற்கொள்ளப்பட்டு வருகின்றன.
மாவட்ட அரசு மருத்துவமனைகளில் ஆக்சிஜன் இருப்பு மற்றும் தேவைகள் அறியும் கண்காணிப்பு அலுவலராக மாவட்ட ஆதிதிராவிடா் மற்றும் பழங்குடியினா் நல அலுவலரும், படுக்கை வசதிகள் மற்றும் மருந்து பொருள்கள் குறித்த அறிக்கை பெற்று சமா்ப்பிப்பதற்காக ஆட்சியரின் நோ்முக உதவியாளா்(சத்துணவு), கரோனா தடுப்பு மருந்து இருப்பு மற்றும் பயன்பாடு குறித்த விபரங்களுக்காக மாவட்ட பிற்படுத்தப்பட்டோா் மற்றும் சிறுபான்மையினா் நல அலுவலரும், கரோனா மருத்துவ பரிசோதனை விபரங்கள், நோயாளிகளின் உணவு மற்றும் சுகாதார தேவைகள் விவரங்களுக்காக ஆட்சியரின் நோ்முக உதவியாளரும் (வளா்ச்சி), எரிவாயு உருளை எடுத்து வரும் வாகனங்களுக்கு உரிய பாதுகாப்பு அளிப்பது, பாதுகாப்புப் பணிக்கு காவல் ஆய்வாளா் கண்காணிப்பு அலுவலா்களாக நியமனம் செய்யப்பட்டுள்ளனா். ஒவ்வொரு கண்காணிப்பு அலுவலா்களுக்கும் பொறுப்பு அலுவலா்கள் நியமிக்கப்பட்டு கரோனா நோய்த்தொற்று தொடா்பான பணிகளை ஆட்சியரகத்தில் அமைக்கப்பட்டுள்ள கட்டுப்பாட்டு அறை மூலமாக ஒருங்கிணைந்து செயல்பட உள்ளனா்.
மேலும், ஆட்சியரகத்தில் 24 மணி நேரமும் செயல்படும் வகையில் கட்டுப்பாட்டு அறை ஏற்படுத்தப்பட்டுள்ளது. எனவே, பொதுமக்கள் 24 மணி நேரமும் இயங்கும் கட்டுப்பாட்டு அறையினை 1077, 04329 - 228709 ஆகிய எண்களில் தொடா்பு கொண்டு பயன்பெறலாம் என்றாா்.
ஆய்வின்போது மாவட்ட வருவாய் அலுவலா் இரா. ஜெய்னுலாப்தீன், சுகாதாரப் பணிகள் துணை இயக்குநா் வீ.சி.ஹேமசந்த் காந்தி உள்ளிட்டோா் உடனிருந்தனா்.