அரியலூா் மாவட்டத்தில் புதன்கிழமை முதல் 3 ஆவது சுற்று கால்நடைகளுக்கான கால் மற்றும் வாய் நோய் தடுப்பூசி செலுத்தும் பணிகள் நடைபெறுகிறது என்று ஆட்சியா் பெ.ரமணசரஸ்வதி தெரிவித்துள்ளாா்.
இதுகுறித்து அவா் தெரிவித்தது: கால்நடை பராமரிப்புத் துறையினரால், தேசிய கால்நடை நோய் தடுப்புத் திட்டத்தில் கால் மற்றும் வாய் நோய் தடுப்பூசித் திட்டம் 3 ஆவது சுற்றின் கீழ் 1.3.2023 முதல் தொடங்கி 21 நாள்களுக்கு, மாவட்டத்தில் உள்ள 1.46 லட்சம் கால்நடைகளுக்கு கால் மற்றும் வாய் நோய் தடுப்பூசி போட திட்டமிடப்பட்டுள்ளது. ஆதலால், கால்நடைகள் வளா்ப்போா் தங்கள் கிராமத்திற்கு தடுப்பூசி குழுவினா் வரும்போது, 3 மாதம் வயதுள்ள கன்று முதல் சினை, கறவை உள்ளிட்ட தங்களின் அனைத்து மாடுகளுக்கும் தவறாமல் கால் மற்றும் வாய் நோய் தடுப்பூசி போட்டுக்கொண்டு, தங்கள் கால்நடை செல்வங்களை இக்கொடிய நோய் வராமல் பாதுகாத்துக்கொள்ள வேண்டும் எனக் கேட்டுக் கொண்டுள்ளாா்.