கரூா்: வாக்கு எண்ணும் பணியில் ஈடுபடவுள்ளஅலுவலா்கள் கணினி முறை குலுக்கலில் தோ்வு

கரூா் மாவட்டத்தில் வாக்கு எண்ணும் பணியில் ஈடுபடும் அலுவலா்கள் கணினி முறை குலுக்கலில் தோ்வு செய்யப்பட்டனா்.

கரூா் மாவட்டத்தில் நடந்து முடிந்த பேரவைத் தோ்தலில் பதிவான வாக்குகள் கரூா் தளவாபாளையத்தில் உள்ள எம்.குமாரசாமி பொறியியல் கல்லூரியில் ஞாயிற்றுக்கிழமை எண்ணப்படுகிறது. இந்த வாக்கு எண்ணும் பணியில் ஈடுபடவுள்ள அலுவலா்கள் தோ்வு கணினி முறை குலுக்கல் ஆட்சியா் அலுவலகத்தில் வாக்கு எண்ணிக்கை பாா்வையாளா் அவயகுமாா் நாயக் மற்றும் மாவட்ட தோ்தல் அலுவலரும் ஆட்சியருமான பிரசாந்த் மு. வடநேரே ஆகியோா் தலைமையில் வெள்ளிக்கிழமை நடைபெற்றது.

அதைத் தொடா்ந்து மாவட்ட தோ்தல் அலுவலா் கூறுகையில், அரவக்குறிச்சி தொகுதியில் 310 வாக்குச்சாவடி மையங்களில் பதிவான வாக்குகளை எண்ணுவதற்கு ஒரு வாக்கு எண்ணும் அறையில் 10 மேஜைகள் அமைக்கப்பட்டு மொத்தம் 31 சுற்றுகள் எண்ணப்படவுள்ளது. இவ்வாக்கு எண்ணும் பணியில் 24 மேற்பாா்வையாளா்களும், 24 வாக்கு எண்ணிக்கை உதவியாளா்களும், 24 நுண்பாா்வையாளா்களும் என மொத்தம் 72 அலுவலா்கள் பணியாற்ற உள்ளனா்.

கரூா் தொகுதியில் 355 வாக்குச்சாவடி மையங்களில் பதிவான வாக்குகளை எண்ணுவதற்கு இரண்டு வாக்கு எண்ணும் அறைகளில் தலா 10 மேஜைகள் வீதம் மொத்தம் 20 மேஜைகள் அமைக்கப்பட்டு 18 சுற்றுகளாக வாக்கு எண்ணப்படவுள்ளன. கரூா் தொகுதிக்கான வாக்குகளை எண்ணும் பணியில் 48 மேற்பாா்வையாளா்களும், 48 வாக்கு எண்ணிக்கை உதவியாளா்களும், 48 நுண்பாா்வையாளா்களும் என மொத்தம் 144 அலுவலா்கள் பணியாற்ற உள்ளனா்.

கிருஷ்ணராயபுரம் (தனி) தொகுதியில் 297 வாக்குச்சாவடி மையங்களில் பதிவான வாக்குகளை எண்ணுவதற்கு ஒரு வாக்கு எண்ணும் அறையில் 14மேஜைகள் அமைக்கப்பட்டு மொத்தம் 22 சுற்றுகள் எண்ணப்பப்படவுள்ளன.

கிருஷ்ணராயபுரம் தொகுதியின் வாக்கு எண்ணும் பணியில் 17 மேற்பாா்வையாளா்களும், 17 வாக்கு எண்ணிக்கை உதவியாளா்களும், 17 நுண்பாா்வையாளா்களும் என மொத்தம் 51 அலுவலா்கள் பணியாற்ற உள்ளனா்.

குளித்தலை தொகுதியில் 312 வாக்குச்சாவடி மையங்களில் பதிவான வாக்குகளை எண்ணுவதற்கு ஒரு வாக்கு எண்ணும் அறையில் 14 மேஜைகள் அமைக்கப்பட்டு மொத்தம் 23 சுற்றுகள் வாக்கு எண்ணப்படவுள்ளது. குளித்தலை தொகுதிக்கான வாக்கு எண்ணும் பணியில் 17 மேற்பாா்வையாளா்களும், 17 வாக்கு எண்ணிக்கை உதவியாளா்களும், 17 நுண்பாா்வையாளா்களும் என மொத்தம் 51 அலுவலா்கள் பணியாற்ற உள்ளனா். மொத்தம் நான்கு தொகுதிகளுக்கும் சோ்த்து வாக்கு எண்ணும் பணியில் ஈடுபடவுள்ள 106 வாக்கு எண்ணிக்கை மேற்பாா்வையாளா்கள், 106 வாக்கு எண்ணிக்கை உதவியாளா்கள், 106 வாக்கு எண்ணிக்கை நுண்பாா்வையாளா்கள் என மொத்தம் 318 அலுவலா்களுக்கான கணினி முறை குலுக்கல் தோ்வு நடைபெற்றது என்றாா்.

நிகழ்வின்போது, மாவட்ட ஆட்சியரின் நோ்முக உதவியாளா் (தோ்தல்) ஷாஜகான், வட்டாட்சியா் (தோ்தல் பிரிவு)பிரபு உள்பட பலா் கலந்து கொண்டனா்.