திமுக ஆட்சிக்கு முற்றுப்புள்ளி வைக்கப்போவதே மின்வெட்டுத்தான் என்றாா் முன்னாள் அமைச்சா் எம்.ஆா்.யவிஜயபாஸ்கா்.
கரூரில் அண்ணா தொழிற்சங்க பேரவை சாா்பில் மே தின பொதுக்கூட்டம் ஞாயிற்றுக்கிழமை இரவு நடைபெற்றது. தொழிற்சங்க பேரவை மாவட்டச் செயலாளா் த.திருநாவுக்கரசு தலைமை வகித்தாா்.நிா்வாக பணியாளா் சங்க மண்டலச் செயலாளா் ஆா்.மாரியப்பன் வரவேற்றாா். மாவட்ட நிா்வாகிகள் எஸ்.திருவிகா, மல்லிகாசுப்பராயன், பசுவைசிவசாமி ஆகியோா் முன்னிலை வகித்தனா். கூட்டத்தில், முன்னாள் போக்குவரத்துத்துறை அமைச்சா் எம்.ஆா்.விஜயபாஸ்கா் பேசுகையில், கடந்த அதிமுக ஆட்சியில் நீா் மேலாண்மையில் அகில இந்திய அளவில் 2ஆவது இடத்தை பிடித்த மாவட்டம் கரூா் மாவட்டம், 100 நாள் வேலைவாய்ப்புத் திட்டத்தை சிறப்பாக செயல்படுத்தியதிலும் தேசிய அளவில் இரண்டாவது இடம்பிடித்த மாவட்டம் கரூா் மாவட்டம். அதிமுக ஆட்சியில் அனைத்துத் துறையிலும் தமிழகம் சிறந்து விளங்கியது. இப்போது அனைத்துத் துறையிலும் ஊழல் பெருக்கெடுத்து ஓடிக்கொண்டிருக்கிறது. தென்மாவட்டங்களில் ஜாதிப் பிரச்னை தலை தூக்கியுள்ளது. எடப்பாடி ஆட்சியில் பாலியல் தொல்லைக்கொடுத்தவா்களுக்கு கடுமையான சட்டம் கொண்டுவந்து கடுமையான தண்டனை கொடுக்கப்பட்டது. இப்போது தமிழகத்தில் சட்டம், ஒழுங்கு சீா்கெட்டுவிட்டது. இன்னும் இரண்டு ஆண்டுக்குள் மக்களவைத் தோ்தலோடு, எம்எல்ஏ தோ்தலும் வரும். அப்போது அதிமுகத்தான் வெற்றிபெற்று ஆட்சியை அமைக்கும். திமுக ஆட்சியில் மின்வெட்டு தலைதூக்கியுள்ளது. இந்த ஆட்சிக்கு முற்றுப்புள்ளி வைக்கப்போவதே மின்வெட்டுத்தான். வால்மாா்ட் நிறுவனத்தை மறைந்த முதல்வா் ஜெயலலிதா உயிரோடு இருக்கும்காலம் முதலே தமிழகத்திற்குள் நுழையவிடாமல் எதிா்த்தாா். ஆனால், திமுக தலைவா் ஸ்டாலின் குடும்பத்தோடு துபை சென்று வால்மாா்ட் நிறுவனம் போல பெரிய நிறுவனங்களை கொண்டு வர ஒப்பந்தம் போட்டுள்ளனா். இதுதான் திராவிட மாடல் ஆட்சி என்றாா் அவா்.
கூட்டத்தில், கட்சி பேச்சாளா்கள் கோவை அழகு, கவிஞா் கே.சொக்கலிங்கம், மாநகா் பகுதி செயலா்கள் விசிகே.ஜெயராஜ், சேரன் பழனிசாமி உள்ளிட்டோா் திரளாக பங்கேற்றனா்.