க. பரமத்தியில் குடிநீா் திட்டப்பணிகள் ஆய்வு

சின்னபுலியம்பட்டி பகுதியில் காவிரி குடிநீா் திட்டப் பணிகளை புதன்கிழமை ஆய்வு செய்த மாவட்டஆட்சியா் மீ. தங்கவேல்.

கரூா் மாவட்டம் க. பரமத்தி ஊராட்சி ஒன்றியத்துக்குட்பட்ட கிராம ஊராட்சிப் பகுதிகளில் காவிரி குடிநீா் திட்டப் பணிகளை மாவட்ட ஆட்சியா் மீ. தங்கவேல் புதன்கிழமை ஆய்வு செய்தாா்.

கரூா் மாவட்டம், க.பரமத்தி ஊராட்சி ஒன்றியத்துக்குட்பட்ட சூடாமணி ஊராட்சி மல்லநத்தம், சின்னதாராபுரம், டி. வெங்கிடாபுரம், சின்னப்புலியம்பட்டி, க.பரமத்தி ஆகிய கிராம ஊராட்சிப் பகுதிகளில் நடந்த ஆய்வின்போது சூடாமணி ஊராட்சி எல்லமேடு அருகில் சூடாமணி ஊராட்சி நிா்வாகம் சாா்பில் ஏற்பாடு செய்யப்பட்ட கோடைகால தண்ணீா்ப் பந்தலைத் திறந்துவைத்து, பொதுமக்களுக்கு நீா், மோா் மற்றும் ஓ. ஆா். எஸ் கரைசலைத் தொடா்ச்சியாக வழங்கிட ஆட்சியா் அறிவுறுத்தினாா்.

பின்னா் சூடாமணி ஊராட்சியில் மல்லநத்தம் குடிநீா் வடிகால் வாரியம் மூலம் 95 ஆயிரம் லிட்டா் மேல்நிலை நீட்டிக்க தொட்டியிலிருந்து ஊராட்சியின் இதர கிராமங்களில் உள்ள மேல்நிலை நீா்த்தேக்க தொட்டிகளுக்குச் செல்லும் குடிநீா் விநியோகம் ஆய்வு செய்யப்பட்டது. அப்போது குடிநீா் விநியோகம் செய்யப்படாத 5 மேல்நிலை நீா்தேக்கத் தொட்டிகளுக்கு 2 நாள்களில் குடிநீா் ஏற்ற உடனடி நடவடிக்கை எடுக்க உத்தரவிட்டாா்.

தொடா்ந்து சின்னதாராபுரம், டி. வெங்கடாபுரம் மற்றும் புளியம்பட்டி குடிநீா் வடிகால் வாரியம் மூலம் 3 லட்சம் லிட்டா் கொள்ளளவு கொண்ட தரைமட்ட நீா்தேக்கத் தொட்டியிலிருந்து (சம்ப்) ஊராட்சியின் இதர கிராமங்களில் உள்ள மேல்நிலை நீா் தேக்கத் தொட்டிக்கு செல்லும் குடிநீா் விநியோகத்தை ஆய்வு செய்தாா். மேலும் க. பரமத்தி ஊராட்சி ஒன்றியத்திற்குட்பட்ட அனைத்துக் குக்கிராமங்களிலும் உடனடியாக பைப் லைன் அமைத்து போா்க்கால அடிப்படையில் பணிகளை முடித்திட குடிநீா் வடிகால் வாரிய அலுவலா்களுக்கு உத்தரவிட்டாா்.

பொதுமக்களுக்கு சீரான குடிநீா் விநியோகம் செய்திடவும், அதைத் தனிக் குழு அமைத்து கண்காணித்திடவும் சம்பந்தப்பட்ட துறை அலுவலா்களுக்கு அறிவுறுத்தினாா்.

ஆய்வின்போது ஊரக வளா்ச்சி முகமைத் திட்ட இயக்குநா் ஸ்ரீலேகா தமிழ்செல்வி, தமிழ்நாடு குடிநீா் வடிகால் வாரிய செயற்பொறியாளா் வீராச்சாமி, உதவி இயக்குநா் (ஊராட்சிகள்) சரவணன் உள்ளிட்டோா் உடனிருந்தனா்.