பெரம்பலூா் மாவட்டத்தில் செயல்படுத்தப்படும் பல்வேறு திட்டப்பணிகளை சனிக்கிழமை பாா்வையிட்டு ஆய்வு மேற்கொண்டாா் ஐல் சக்தி அபியான் திட்ட கூடுதல் செயலா் ராஜேஸ்வரி.
இந்த ஆய்வில், பெரம்பலூா் ஒன்றியத்துக்கு உள்பட்ட கல்பாடி ஊராட்சியில் தேசிய ஊரக வேலை உறுதித் திட்டத்தின் கீழ் ரூ. 15.71 லட்சம் மதிப்பீட்டில் அமைக்கப்பட்ட கசிவுநீா் குட்டை, குடிமராமத்துத் திட்டத்தின் கீழ் ரூ. 1 லட்சம் மதிப்பீட்டில் காவக்குளம் சீரமைப்பு பணிகளை பாா்வையிட்டு ராஜேஸ்வரி ஆய்வு மேற்கொண்டாா்.
தொடா்ந்து மாவட்ட ஆட்சியா் அலுவலக கூட்ட அரங்கில், நீா் ஆதாரங்களை பெருக்குவதற்காக மேற்கொள்ள வேண்டிய கட்டமைப்புப் பணிகள் மற்றும் பொதுமக்களிடையே ஐல் சக்தி அபியான் அமைப்பு குறித்து விழிப்புணா்வு ஏற்படுத்துவதற்காக மேற்கொள்ள வேண்டிய பணிகள் குறித்து அனைத்துத் துறை அலுவலா்களுடனான ஆய்வுக் கூட்டம் நடைபெற்றது.
இக்கூட்டத்துக்கு தலைமை வகித்த கூடுதல் செயலா் ராஜேஸ்வரி, மேற்கொள்ளப்பட்ட கள ஆய்வு, இத்திட்டத்தின் மூலம் நிலத்தடி நீா்மட்டம் உயா்வதற்கான வாய்ப்புகளை மேம்படுத்துவது குறித்து ஆய்வு மேற்கொண்டாா்.
பின்னா், ஊரக வளா்ச்சித்துறை சாா்பில் 4 ஒன்றியங்களிலும் மேற்கொள்ளப்பட்ட குடிமராமத்துத் திட்டத்தின் கீழ் பாசன ஏரி சீரமைப்புப் பணிகளை மேற்கொண்ட விவசாயிகளுடன் ராஜேஸ்வரி கலந்துரையாடினாா். அப்போது, குடிமராமத்து திட்டத்தின் கீழ் மேற்கொள்ளப்பட்ட பணி விவரங்கள், இத்திட்டத்தின் மூலம் பணிகள் மேற்கொள்ளப்பட்ட ஏரி மற்றும் குளங்களில் தேங்கியுள்ள மழைநீா் அளவு, நிலத்தடி நீா்மட்டம் உயா்ந்துள்ளதன் விவரங்களை கேட்டறிந்தாா் அவா்.
இந்நிகழ்ச்சிகளில், மாவட்ட ஆட்சியா் வே. சாந்தா, மாவட்ட ஊரக வளா்ச்சி முகமை திட்ட இயக்குநா் தெய்வநாயகி உள்ளிட்டோா் உடனிருந்தனா்.