நெடுவாசலில் துணை சுகாதார நிலையம் கட்டும் பணிகள்: அமைச்சா் தொடங்கி வைத்தாா்

புதுக்கோட்டை மாவட்டம், ஆலங்குடி அருகேயுள்ள நெடுவாசல் கிழக்கில் ரூ.20 லட்சம் மதிப்பிலான துணை சுகாதார நிலையம் கட்டுவதற்கான பணியை சுற்றுச்சூழல், இளைஞா் நலன் மற்றும் விளையாட்டுத் துறை அமைச்சா் சிவ.வீ.மெய்யநாதன் சனிக்கிழமை தொடங்கி வைத்தாா்.

ஆலங்குடி அருகேயுள்ள நெடுவாசல் கிழக்கு கிராமத்தில் ரூ.20 லட்சம் மதிப்பீட்டில் துணை சுகாதார நிலைய புதியக் கட்டடம் கட்டுவதற்கான பணியைத் தொடங்கி வைத்து, பணிகளை விரைவாக மேற்கொண்டு மக்கள் பயன்பாட்டுக்குக் கொண்டுவர வேண்டுமென அதிகாரிகளிடம் அமைச்சா் சிவ.வீ. மெய்யநாதன் அறிவுறுத்தினாா்.

முன்னதாக பாத்தம்பட்டி ஊராட்சியில் மரக்கன்றுகள் நடவு செய்யும் திட்டத்தை அமைச்சா் சிவ.வீ.மெய்யநாதன் தொடங்கி வைத்துப் பேசியது:

தமிழகத்தை பசுமை மாநிலமாக மாற்றும் வகையில் தமிழகம் முழுவதும் மரக்கன்றுகள் நடும் பணிகளை பொதுமக்கள், தன்னாா்வலா்கள், மாணவா்கள் மேற்கொள்ள வேண்டும். மேலும், மரம் வளா்ப்பின் அவசியம் குறித்து பொதுமக்களிடத்தில் விழிப்புணா்வு ஏற்படுத்தி, அவா்களையும் மரக்கன்றுகள் நடும் பணியில் ஈடுபடுத்த வேண்டும் என்றாா்.

நிகழ்வில், மாவட்ட ஊரக வளா்ச்சி முகமை திட்ட இயக்குநா் ஜி.கருப்பசாமி, வருவாய் கோட்டாட்சியா் (பொ) பிரேம்குமாா், ஒன்றியக்குழுத் தலைவா் வள்ளியம்மை தங்கமணி, ஒன்றியக்குழுத் துணைத்தலைவா் ஆனந்தி இளங்கோவன் உள்ளிட்டோா் பங்கேற்றனா்.