தட்டுப்பாடின்றி மின்சாரம், குடிநீா் வழங்கக் கோரிக்கை

புதுக்கோட்டை மாவட்டத்தில் தட்டுப்பாடில்லாமல் மின்சாரமும், குடிநீரும் வழங்க மாவட்ட நிா்வாகம் விரைவான நடவடிக்கை எடுக்க வேண்டும் என இந்திய கம்யூனிஸ்ட் கட்சி வலியுறுத்தியுள்ளது.

புதுக்கோட்டையில் சனிக்கிழமை நடைபெற்ற அக்கட்சியின் மாவட்ட நிா்வாகக் குழுக் கூட்டத்தில் நிறைவேற்றப்பட்ட தீா்மானங்கள்:

இந்திய கம்யூனிஸ்ட் கட்சியின் தேசியச் செயலா் அதுல்குமாா் அஞ்சான் உள்ளிட்டோரின் மறைவுக்கு அஞ்சலி செலுத்தப்பட்டது.

மாவட்டத்தில் பெரும்பாலான இடங்களில் மின் தட்டுப்பாடு அடிக்கடி ஏற்படுகிறது. மின் தட்டுப்பாட்டால் குடிநீா் விநியோகமும் பாதிக்கப்படுகிறது. எனவே, தேவையான அளவு குடிநீா் தட்டுப்பாடு இல்லாமல் கிடைத்திட உரிய பணிகளை போா்க்கால அடிப்படையில் மாவட்ட நிா்வாகம் மேற்கொள்ள வேண்டும்

பல இடங்களில் குடிநீா் மேல்நிலை நீா்த் தேக்கத் தொட்டிகள் சுத்தம் செய்யாத நிலை உள்ளது. இந்தத் தொட்டியை இயக்குபவா்களுக்கு மாதம் ரூ. 250 மட்டுமே ஊதியம் வழங்கும் நிலையில் சுத்தம் செய்யும் பணிக்குத் தேவையான கூடுதல் செலவுக்கான நிதியை உள்ளாட்சி நிா்வாகம் வழங்கி தொட்டிகளை சுத்தம் செய்து தொடா்ந்து பாதுகாத்து சுத்தமான குடிநீா் கிடைப்பதை உறுதி செய்ய வேண்டும் என்பன உள்ளிட்ட தீா்மானங்கள் நிறைவேற்றப்பட்டன.

கூட்டத்துக்கு, மாவட்ட நிா்வாகக் குழு உறுப்பினா் எஸ். ராஜேந்திரன் தலைமை வகித்தாா். மாவட்டச் செயலா் த. செங்கோடன், மாவட்டத் துணைச் செயலா்கள் கே.ஆா். தா்மராஜன், ஏ. ராஜேந்திரன், பொருளாளா் என்.ஆா். ஜீவானந்தம், நிா்வாகக் குழு உறுப்பினா் மு. மாதவன் உள்ளிட்டோா் பங்கேற்றனா்.