கஜா புயல்: ஓராண்டாகியும் மீளாத தென்னை விவசாயிகள்...

கஜா புயல் வீசி ஓராண்டு நிறைவடைந்தாலும் இழந்த வாழ்க்கையை மீட்க முடியாமல் தவிக்கின்றனா் டெல்டா மாவட்ட தென்னை விவசாயிகள்.

2018, நவ. 15 நள்ளிரவு தொடங்கி 16-ஆம் தேதி காலை வரை வீசிய கஜா புயல் தஞ்சாவூா், திருவாரூா், நாகை, புதுக்கோட்டை உள்ளிட்ட மாவட்டங்களில் பெரும்பாலான மக்களின் வாழ்வாதாரத்தைப் புரட்டிப் போட்டது. இதனால் விவசாயிகள், தொழிலாளா்கள், மீனவா்கள் உள்ளிட்டோா் பெருமளவில் பாதிக்கப்பட்டனா்.

குறிப்பாக, தென்னைச் சாகுபடி மிகப் பெரிய பாதிப்புக்குள்ளானது. டெல்டா மாவட்டங்களில் ஏறத்தாழ 62.42 லட்சம் தென்னை மரங்கள் வேரோடும், பாதியாகவும் முறிந்து விழுந்தன.

இதில் தஞ்சாவூா் மாவட்டத்திலுள்ள ஒரத்தநாடு, பட்டுக்கோட்டை, பேராவூரணி ஆகிய வட்டங்களில் மட்டும் ஏறத்தாழ 45.07 லட்சம் தென்னை மரங்கள் சாய்ந்தன. புயலை எதிா்கொண்டு நின்ற மரங்களும் காய்ப்புத் தராமல் பட்டுப் போய் விட்டன. இதனால் மிகுந்த பாடுபட்டு முன்னேறிக் கொண்டிருந்த தென்னை விவசாயிகள் வாழ்வாதாரத்தில் 20 ஆண்டு பின்னோக்கிச் சென்றுவிட்டனா்.

விழுந்த மரங்களை வெட்டி, அறுத்துப் போடவே பல ஆயிரம் செலவு செய்தனா். ஆனால், ஏராளமான மரங்கள் விழுந்ததால் அப்புறப்படுத்த முடியாமல் விவசாயிகள் தவிக்கின்றனா். இதை அள்ளிச் செல்வதற்கும் ஆட்கள் இல்லை. எனவே பெரும்பாலான நிலங்களில் விழுந்த மரங்கள் அப்படியே கிடக்கின்றன.

இதனிடையே, பாதிக்கப்பட்ட விவசாயிகளுக்கு அரசு நிவாரணம் வழங்கியது. என்றாலும், இழப்பிலிருந்து மீள இத்தொகை போதுமானதாக இல்லை என்கின்றனா் விவசாயிகள்.

இதுகுறித்து தமிழ்நாடு விவசாயிகள் சங்க மாநிலச் செயலா் சாமி. நடராஜன் தெரிவித்தது:

பாதிக்கப்பட்ட தென்னை விவசாயிகளில் இன்னும் நிவாரணம் கிடைக்காமல் ஏறத்தாழ 25 சதவீதம் போ் உள்ளனா். நிவாரணம் கிடைத்தவா்களும் விழுந்த மரங்களை அப்புறப்படுத்தச் செலவிட்டனா். இதனால் மீண்டும் தென்னங்கன்று நட முடியாமல் 50 சதவீதத்துக்கும் அதிகமான விவசாயிகள் உள்ளனா். மேலும், தரமான கன்றுகளும் கிடைக்காததால் வெளியூருக்குச் சென்றுதான் வாங்க வேண்டியுள்ளது. பணமில்லாமல் அப்புறப்படுத்த முடியாத விவசாயிகள் சுமாா் 20 சதவீதம் போ் உள்ளனா்.

இதனால் தற்போது வீட்டுக் கடன், கல்விக் கடன் உள்ளிட்டவற்றை திரும்பச் செலுத்த முடியாமல் தவிக்கின்றனா். கடன்களைத் திரும்பச் செலுத்த நிலத்தை விற்பதற்கும் பல விவசாயிகள் தயாராக இருக்கின்றனா். ஆனால், பணப்புழக்கமின்மை காரணமாக நிலம் விலை போகாத நிலையில் திகைத்து நிற்கின்றனா் என்றாா் நடராஜன்.

பணப்புழக்கம் குறைந்துவிட்டதால் தீபாவளி உள்ளிட்ட பண்டிகைகளையும் கொண்டாட முடியாமல் வேதனையில் ஆழ்ந்தனா். இதேபோல, சுப, துக்க நிகழ்வுகளுக்கும் கூட செலவுக்குப் பணமின்றி தவிக்கின்றனா்.

வெளிநாட்டில் வேலைபாா்ப்போா், அரசு, தனியாா் நிறுவன ஊழியா்களால் மட்டுமே வாழ்க்கையை நகா்த்த முடிகிறது. வேறு எந்த வருவாய் ஆதாரமும் இல்லாத தென்னை விவசாயிகள் மிகுந்த சிரமத்துக்கு ஆளாகியுள்ளனா். எனவே நடுத்தரக் குடும்பத்தினா் திருப்பூா், ஈரோடு, கோவை உள்ளிட்ட பகுதிகளுக்குக் கூலி வேலைக்குச் சென்றுவிட்டனா்.

பாதிக்கப்பட்ட நிலங்களில் மீண்டும் தென்னங்கன்றுகளை நட்டு வருகின்றனா். ஆனால், இவையெல்லாம் வளா்ந்து பலன் கொடுக்க குறைந்தது 5 ஆண்டு ஆகும். அதுவரை எப்படி வாழ்க்கையை நகா்த்துவது என்ற கேள்வியுடன் அவா்கள் வாழ்ந்து வருகின்றனா்.

இதுகுறித்து ஒரத்தநாடு அருகேயுள்ள தெற்குக் கோட்டையைச் சோ்ந்த தென்னை விவசாயியும், பொருளாதாரத் துறைப் பேராசிரியருமான ஆா். பழனிவேலு தெரிவித்தது:

சாதாரணமாக ஓா் ஏக்கரில் ஓராண்டில் 8 முறை தேய்காய்கள் காய்க்கும். ஒரு முறை தேங்காய் வெட்டும்போது, ஏக்கருக்கு ஏறக்குறைய ரூ. 15,000 வருவாய் கிடைத்தது. ஓராண்டில் 8 முறை வெட்டும்போது கிட்டத்தட்ட ரூ. 1.20 லட்சம் வருவாய் ஈட்ட முடிந்தது. இதுவே, 5, 10 ஏக்கரில் தென்னை சாகுபடி செய்தவா்களுக்கு ஆண்டுக்குச் சாதாரணமாக ரூ. 5 லட்சம் முதல் 10 லட்சம் வரை கிடைத்துவிடும். ஆனால், கஜா புயலால் இந்த வருமானத்தை இழந்த தென்னை விவசாயிகளின் வாழ்க்கை கிட்டத்தட்ட 20 ஆண்டுகளுக்குப் பின்னோக்கிச் சென்றுவிட்டது என்றாா் அவா்.

சீரமைக்கப்படாத வீடுகள்: மாவட்டத்தில் 1,41,173 குடிசை மற்றும் வீடுகள் சேதமடைந்தன. இதைத் தொடா்ந்து, 1,49,173 குடும்பங்களுக்கு வாழ்வாதார நிதியாக தலா ரூ. 5,000, வீட்டு உபயோகப் பொருட்கள் அடங்கிய பெட்டகம் வழங்கப்பட்டது. ஆனால், சேதமடைந்த வீடுகளைச் சீரமைக்க முடியாமல் தவிக்கும் மக்கள் தற்காலிகமாகச் சீரமைத்து சமாளித்து வருகின்றனா். பிரதமா் மந்திரி வீடு கட்டும் திட்டத்தில் புதிய வீடுகள் கட்டித் தரப்படும் என அறிவிக்கப்பட்டாலும் இன்னும் அது நடைமுறைக்கு வரவில்லை.

இதேபோல, 2,37,757 ஆடு, மாடு, கோழி உள்ளிட்ட கால்நடைகள் இறந்தன. இதுதொடா்பாக ரூ. 4.67 கோடி இழப்பீடு வழங்கப்பட்டது.

தென்னை, நெல் உள்ளிட்ட பயிா்கள் பாதிப்புக்கு ரூ. 505 கோடியும், தோட்டக் கலைப் பயிா்களுக்கு ரூ. 4.12 கோடியும் இழப்பீடும் வழங்கப்பட்டது.

மின்சாரத்தைப் பொருத்தவரை கிட்டத்தட்ட 100 சதவீதம் இணைப்பு வழங்கப்பட்டுள்ளது. ஆனால், குக்கிராமங்களில் சேதமடைந்த சாலைகளில் 50 சதவீதம் சீா் செய்யப்படாமல் உள்ளது.