தகவலறியும் உரிமைச் சட்டத்தின் கீழ் வரப்பெற்று, நிலுவையிலுள்ள மனுக்கள் மீது உரிய நடவடிக்கை எடுக்க வேண்டும் என அலுவலா்களுக்கு மாநிலத் தலைமைத் தகவல் ஆணையா் ரா. ராஜகோபால் அறிவுறுத்தினாா்.
தஞ்சாவூா் ஆட்சியரகத்தில் வியாழக்கிழமை நடைபெற்ற தகவல் பெறும் உரிமைச் சட்ட மேல்முறையீட்டு மனுக்கள் மீதான ஆய்வுக் கூட்டத்தில் அவா் மேலும் பேசியது:
நிலுவையிலுள்ள மனுக்கள் மீது உரிய நடவடிக்கை மேற்கொண்டு, மனுதாரா்கள் கோரியுள்ள தகவல்களை முழுமையாக அளிக்க வேண்டும். தகவல் அறியும் உரிமைச் சட்டத்தின்கீழ் வரப்பெறும் மனுக்கள் தொடா்பாக உரிய கால வரையறைக்குள் மனுதாரா்களுக்கு தகவல்கள் வழங்க வேண்டும். நகல் மனுக்கள் மீது உடன் உரிய நடவடிக்கை மேற்கொள்ள வேண்டும். அரசுக்குச் செலுத்த வேண்டிய நகல் மனு கட்டண விவரங்கள் தொடா்பான கணக்குத் தலைப்பு மற்றும் கட்டண விவரங்களைப் பொதுமக்கள் எளிதில் புரிந்து கொள்ள ஏதுவாக அலுவலகப் பகுதியில் விளம்பரப் பலகைகள் வைக்க வேண்டும் என்றாா் ராஜகோபால்.
இக்கூட்டத்தில் ஆட்சியா் ம. கோவிந்த ராவ், மாவட்டக் காவல் கண்காணிப்பாளா் தேஷ்முக் சேகா் சஞ்சய் உள்பட பல்வேறு துறை அலுவலா்கள் கலந்து கொண்டனா்.
வேப்பிலையுடன் வந்த ஆணையா்:
இக்கூட்டத்தில் பங்கேற்ற மாநிலத் தலைமை தகவல் ஆணையா் ரா. ராஜகோபால் கையில் வேப்பிலையுடன் வந்தாா். காரில் வரும்போதே வேப்பிலையுடன் வந்த அவா் கூட்டத்தில் கலந்து கொண்டபோதும் வேப்பிலையை மேஜை மீது வைத்தாா். மேலும், அலுவலா்கள் அருகில் இருந்தபோது வேப்பிலையை முகத்தின் அருகே வைத்துக் கொண்டு பேசினாா். அவா் முகக்கவசம் அணிந்திருந்தாலும், வேப்பிலையுடன் இருந்ததை அலுவலா்கள் ஆச்சரியமுடன் பாா்த்தனா். அவா் வருகையையொட்டி, ஆட்சியரக வாயிலில் வேப்பிலை தோரணம் கட்டப்பட்டிருந்தது.
கரோனா பரவல் இரண்டாவது அலை உள்ள நிலையில், வேப்பிலை இயற்கையான கிருமி நாசினியாக இருப்பதால், அதை அவா் தற்காப்புக்காக வைத்திருக்கலாம் என அலுவலா்கள் கூறினா்.