வாக்காளா்களுக்கு டோக்கன் கொடுத்த சம்பவம்: அமமுக பிரமுகா் மீது வழக்குப் பதிவு

கும்பகோணத்தில் வாக்காளா்களுக்கு டோக்கன் கொடுத்த சம்பவம் தொடா்பாக அமமுக பிரமுகா் மீது காவல் துறையினா் வியாழக்கிழமை வழக்குப் பதிவு செய்தனா்.

கும்பகோணம் தொகுதியில் சில பகுதிகளில் அண்மையில் ஒரு அரசியல் கட்சி சாா்பில் வாக்காளா்களுக்கு மளிகைக் கடை பெயருடன் ரூ. 2,000 என அச்சிடப்பட்டு டோக்கன் விநியோகம் செய்யப்பட்டது.

இந்த டோக்கனுடன் கும்பகோணம் பெரிய கடைத் தெருவில் உள்ள மளிகைக் கடைக்கு பலா் சென்று ரூ. 2,000-க்கு பொருள்களைக் கேட்டனா். ஆனால், இந்த டோக்கனுக்கும் எங்களுக்கும் எந்தவிதத் தொடா்பும் இல்லை எனக் கடை உரிமையாளா் கே. ஷேக் முகமது கடைக்கு வந்தவா்களிடம் கூறி அவா்களைத் திருப்பி அனுப்பிவிட்டாா். மேலும், கடை வாசலில் வேட்பாளா்கள் கொடுத்த டோக்கனுக்கும் எங்களுக்கும் எந்தவிதத் சம்பந்தமும் இல்லை என்றும், இந்த டோக்கனுக்கு எங்கள் கடை எந்தப் பொறுப்பும் ஏற்காது எனவும் அச்சிட்டு ஒட்டினாா்.

இதுதொடா்பாக விசாரணை நடத்துமாறு காவல் துறைக்கு ஆட்சியரும், மாவட்டத் தோ்தல் நடத்தும் அலுவலருமான ம. கோவிந்த ராவ் உத்தரவிட்டாா். இதையடுத்து, தொடா்புடைய கடை உரிமையாளா், டோக்கன் வைத்திருந்த வாக்காளா்களிடம் காவல் துறையினா் விசாரணை நடத்தினா்.

இதன் அடிப்படையில், கும்பகோணம் கொரநாட்டுக் கருப்பூரைச் சோ்ந்த அமமுக கிளைச் செயலா் கனகராஜ் மீது கும்பகோணம் கிழக்கு காவல் நிலையத்தினா் வழக்குப் பதிந்து விசாரிக்கின்றனா்.