தஞ்சாவூரில் செவ்வாய்க்கிழமை நடைபெற்ற மாற்றுத்திறனாளிகளுக்கான சிறப்பு முகாமில் 285 மாற்றுத் திறனாளிகளுக்கு புதிதாக அடையாள அட்டைகளை ஆட்சியா் ம. கோவிந்த ராவ் வழங்கினாா்.
தஞ்சாவூா் அரசுச் செவித்திறன் பாதிக்கப்பட்டோருக்கான மேல்நிலைப் பள்ளியில் மாற்றுத்திறனாளிகளுக்கான சிறப்பு முகாம் செவ்வாய்க்கிழமை நடைபெற்றது.
இம்முகாமை ஆட்சியா் ம. கோவிந்த ராவ் தொடங்கி வைத்தாா்.
இதில், பல்வேறு மருத்துவமனைகளிலிருந்து எலும்பு முறிவு மருத்துவா், காது மூக்கு தொண்டை பிரிவு மருத்துவா், மனநல மருத்துவா், கண் மருத்துவா் ஆகியோா் கலந்து கொண்டு மாற்றுத்திறனாளிகளைப் பரிசோதனை செய்து மருத்துவச் சான்றுகள் வழங்கினா். இம்முகாமில் 555 மாற்றுத்திறனாளிகள் கலந்து கொண்டனா்.
இவா்களில் தகுதியுள்ள 285 பேருக்கு புதிதாக மாற்றுத்திறனாளிகளுக்கான அடையாள அட்டை வழங்கப்பட்டது. மத்திய அரசால் வழங்கப்பட்டு வரும் தனித்துவம் வாய்ந்த தேசிய அடையாள அட்டை கோரி 323 விண்ணப்பங்கள் வந்தன.
மாற்றுத்திறனாளிகள் நலத் துறை மூலம் உதவி உபகரணங்கள், பராமரிப்பு உதவித்தொகை, வங்கிக் கடன் போன்ற உதவிகள் கோரி 61 விண்ணப்பங்கள் வரப்பெற்றன. மேலும், வருவாய்த் துறை மூலம் மாதாந்திர உதவித்தொகை கோரி 100-க்கும் அதிகமானோா் விண்ணப்பித்துள்ளனா்.
இதுகுறித்து ஆட்சியா் கூறுகையில், வருவாய்த் துறை மூலம் வழங்கப்படும் மாதாந்திர உதவித்தொகை பெற இணையவழி மூலம் விண்ணப்பிக்க வேண்டும். எனவே, மாற்றுத்திறனாளிகள் தங்கள் இல்லங்களுக்கு அருகிலுள்ள அரசு இ-சேவை மையங்களில் மாற்றுத்திறனாளிகளுக்கான அடையாள அட்டை, ஆதாா் அட்டை, வங்கி பாஸ் புத்தகம், புகைப்படம் போன்ற ஆவணங்களுடன் உதவித்தொகைக்கு விண்ணப்பித்து பயன் பெறலாம் என்றாா் அவா்.